وزیراعظم شاہد خاقان عباسی نا مولانا مفتی محمود نا اعزاز اٹی یات گاری ٹکٹ اس جاری کننگ نا دود آن تران

اسلام آباد(پاکستان نیوزپوائنٹ13اکتوبر2017ء) مولانا مفتی محمود نا اعزاز اٹی یات گاری ٹکٹ اسے نا جاری کننگ نا خصوصی دود جمعہ نا دے داڑے وزیراعظم سیکرٹریٹ اٹی اڈ ہلک۔

دود آن تران کرسا وزیراعظم شاہد خاقان عباسی پارے کہ دود اٹی شرکت کنکن اعزاز نا سوب اسے و داٹی اسہ ہندن ءُ پروقار ءُ بندغ اسے آ ہیت وگپ کننگ اُن ہرانا قومی سیاست اٹی بھاز انگا خذمت آک ءُ۔

اوپارے کہ مولانامفتی محمود اسلام کن ہم بھلو خذمت اس سرانجام تس و ہربندغ چاہک کہ او اسلام نا خذمت ءِ کرے و قومی سیاست اٹی اسہ پوسکن ءُ طرز اس قائم کرے۔

وزیراعظم پارے کہ اوڑکن دُن انگا گڑاتا گرج اف ولے سرکاری کہول آ اونا خذمت آتا اعتراف اٹی یات گاری ٹکٹ جاری کننگک تانکہ تاریخ اٹی اونا خذمت آتے یات تخنگ مرے۔

اووزارت پوسٹل سروسز نا کمامدارآتے تجویز پیش کرے کہ پاکستان نا خذمت ءِ کروک آ ایلو مذہبی و سیاسی سرکڑدہ غاتے کن ہم یات گاری ٹکٹ جاری کننگے۔

اوپارے کہ پوسٹل سروسز نا بشخ اٹی بھاز انگا جدت آتے ودی کننگ مریک ہراوخت ءِ حاضرہ نا گرج ہم ارے۔ وزیراعظم شاہد خاقان عباسی مولانا مفتی محمود نا شخصیت، اونا خذمت، ملک و آئین و پارلیمان و طرز سیاست کن کروک آ خذمت آتا ستاءِ کرسا پارے

کہ دااقدار نا اینو ہم گرج ارے۔

اوپارے کہ کنے دا شرف ہم دوئی ارے کہ ہراتم 1972ء ٹی او وزیراعلیٰ خیبر پختونخواجوڑ مس تو ای پشاور اٹی خواناٹہ و پشاور ایئر پورٹ آ اسہ وار اوڑتون اوڑدہی ہم مسوسس۔

اوپارے کہ 1977ء نا تحریک نظام مصطفی و ختم نبوت نا بابت اونا خذمت آک الس نا نظرآن ڈکوک افس۔ او 1977 ء نا تحریک نا روح رواں ئس۔

مولانا مفتی محمود اسہ ہندن ءُ شخصیت اس ئس ہرانا اسٹ اس ہم برخلاف الوکہ و غٹ سیاسی جماعت و سیوتی تا دیوان اونا کماشی ٹی مسکہ۔

وزیراعظم پارے کہ اونا ملک اکن بھاز انگا خذمت آک ءُ ہرافتے ٹی دینی خذمت و خصوصی وڑاٹ قومی سیاست اٹی اونا کڑد بھاز اہم ءِ۔

وزیراعظم پارے کہ مولانا مفتی محمود نا صاحبزادہ مولانا فضل الرحمان ہم تینا باوہ نا پیروی ءِ کرسا خلقت ءِ اسہ ایلو تون ملفنگ نا کڑد ءِ ادا کننگ ءِ ہرانا اینو غٹ آن زیات گرج ءِ۔

دوداٹی ڈپٹی چیئرمین سینیٹ مولانا عبدالغفور حیدری ، جمعیت علمائے اسلام (ف) انا راہشون مولانا فضل الرحمان، وزارت پوسٹل سروسز نا وزیر مولانا امیر زمان، بنجائی وزیر ہاؤسنگ و تعمیرات اکرم درانی تون اوار ایلو چندی شخصیت آک شرکت کریر وخت اس کہ مولانا فضل الرحمان ہم داوخت آ تران کرے۔