امریکی، روسی اتے جرمن خلاباز بین الاقوامی خلائی سٹیشن تے 197ڈینھ رہنڑ دے بعد زمین تے واپس پج گن
ماسکو (پاکستان پوائنٹ نیوز20دسمبر 2018ء) امریکی، روسی اتے جرمن خلاباز روس دے سویوز ایم ایس۔09 راکٹ دے ذریعے خمیس دی ڈوپہر زمین تے واپس پج گن ۔
روسی مشن کنٹرول دے مطابق ترائی خلا باز بین الاقوامی خلائی سٹیشن تے چھی مہینے رہنڑ دے بعد واپس زمین تے آگن۔واپس آونڑ آلیں اچ خلائی تحقیق دے امریکی ادارے ناسا دی سیرینا آنون چانسلر، روس دے سرگی پروکوپائیوف اتے جرمنی دے الیگزینڈر گرسٹ جنہاں د اتعلق یورپین سپیس ایجنسی توں اے شامل ہن ۔
زمین تے آونڑ دے بعد خلا بازاں
ولوں جاری ریڈیو پیغام اچ ڈسایا گے جو او سارے خیریت نال ہن ۔زمینی عملے وختی خلابازاں کوں قزاخستان اچ انہاں دی لینڈنگ دی جاہ توں سویوز کیپسول توں کڈھ تے ابتدائی میڈیکل چیک اپ کیتے نیڑے شہر دے ہسپتال منتقل کر ڈتے جتھاں انہاں دے استقبال کیتے ہک تقریب وی کیتی گی۔
بعد اچ جرمن تے امریکی خلا باز اپنڑے اپنڑے ملک روانہ تھی ویسن جتھاں انہاں دا تفصیلی طبی معائنہ کیتا ویسی ۔ ترائی خلا باز زمین تے مقررہ وقت توں ہک منٹ پہلے مقامی وقت دے مطابق 11وج تے ڈو منٹ تے پجن ۔