وزیراعظم محمد نواز شریف دا سیالکوٹ۔لاہور موٹروے منصوبے دا منڈھ بدھنڑ دی تقریب دے موقع تے جلسہ عام نال خطاب
سیالکوٹ (پاکستان نیوز پوائنٹ 22اگست 2016ء) وزیراعظم محمد نواز شریف آکھیا جو اساں پاکستان دی ترقی تے خوشحالی دی تحریک چلیندے پیسے،مخالفین دی تحریک فساد،بد امنی اتے ترقی مخالف اے،پاکستان توں اندھارے مکیسوں،خوشحالی اتے روشنیاں کوں ودھیسوں۔
سوموار کوں اتھاں سیالکوٹ۔لاہور موٹروے منصوبے دا منڈھ بدھنڑ دی تقریب دے موقع تے جلسہ عام نال خطاب کریندیں ہوئیں انہاں آکھیا جو اے منصوبہ سیالکوٹ دی عوام سانگے تحفہ اے جیڑھا جو ترقی دا پیش خیمہ ثابت تھیسی،اساڈا کنٹینر ترقی تے خوشحالی دا کنٹینر اے،اساں ملک دی سڑکاں بنڑیندے پیسے ،کجھ لوک سڑکاں تے امدے پئن ،پاکستانی نینگر ترقی تے خوشحالی چاہندن ،مخالفین اساڈے ترقی دے پروگرام توں خائف ہن ،عوام ترقی سانگے فساد
کوں رد کر ڈیون،اگلے ڈو سالیں اچ ترقیاتی کماں دا روشن باب ہوسن،فوج پولیس اتے سکیورٹی اداریاں کوں سلام پیش کریندے ہیسے،دہشت گردی کوں یکا سانگے مُکا ڈیسوں۔
چین دے تعاون نال راہداری منصوبہ جلدی پورا تھیسی۔اساں خراب حال ریلوے اتے پی آئی اے کوں ٹھیک کیتے،پی آئی اے دی پریمیئر سروس سیالکوٹ توں وی شروع تھیسی،سیالکوٹ توں لاہور دا سفر ترائے گھنٹے پنجاہ منٹ اچ تھیسی،موٹروے سیالکوٹ توں کھاریاں وی ویسی۔
انہاں آکھیا جو سیالکوٹ دی تریخ اچ اج وکھرا ڈینھ اے جو اتھاں موٹر وے دا منڈھ بدھیا ویندا پئے جئیں نال سارا سیالکوٹ جُڑ ویسی،سیالکوٹ توں پسرور تئیں وی سڑک بنڑائی ویسی۔
انہاں آکھای جو عوام دا جذبہ ڈیکھ کراہیں کنٹینر تے چڑھنڑ آلے بہہ ویسن۔