اسلام آباد (پاکستان نیوز پوائنٹ 24اگست 2016ء) وزيراعظم محمد نواز شريف چيو آهي ته بلوچستان سندس دل جي تمام ويجهو آهي، فوجي ۽ سويلين سيڪيورٽي اهلڪارن ۽ صوبي جي امن پسند ماڻهن جي بي پناهه قربانين جي ڪري بلوچستان ۾ امن بحال ٿيو آهي، اسان امن ۽ ترقي جي دشمنن کي صوبي ۾ ترقي جي عمل ۾ رڪاوٽ وجهڻ جي ڪڏهن به اجازت نه ڏينداسين. هن اها ڳالهه بلوچستان جي وڏي وزير سردار ثناءُ الله زهري سان ڪالهه اربع ڏينهن وزيراعظم هائوس ۾ ڳالهائيندي چئي. وڏي وزير وزيراعظم کي صوبي ۾ مجموعي سلامتي جي صورتحال خاص طور تي ڪوئيٽا حملي کانپوءِ شهرين جي امن ۽ سلامتي کي يقيني بڻائڻ جي لاءِ صوبائي حڪومت پاران کنيل قدمن بابت آگاهه ڪيو.
هن وزيراعظم کي بلوچستان جي مختلف حصن ۾ جاري ترقياتي منصوبن ۽ فلاحي اسڪيمن بابت پڻ ٻڌايو. وزيراعظم نواز شريف چيو ته وفاقي حڪومت بلوچستان جي عوام جي زندگي جو معيار بلند ڪرڻ جي لاءِ صوبي ۾ بنيادي ڍانچي جي ترقي ۽ فلاحي منصوبن کي اڳيان وڌائڻ جي لاءِ پرعزم آهي. هن چيو ته بلوچستان صوبي کي پاڪ چين اقتصادي لنگهه مان سڀ کان وڌيڪ فائدو ٿيندو.