4ورھے پہلاں لاپتا ہون والا ملائیشین جہاز ایم ایچ 370لبھ گیا

آسٹریلیا(پاکستان پوائنٹ نیوز19۔مارچ2018ء) آسٹریلوی انجینئر نے دعوا کیتا اے کہ اوہنے گوگل ارتھ دی مدد نال لاپتا ہون والا ملائیشین جہاز لبھ لیا اے۔

میڈیا رپورٹ مطابق مکینیکل انجینئر پیٹر میک مہن نے دعوا کیتا کہ اوہنے چار ورھے پہلاں لاپتا ہون والا ملائیشین جہاز لبھ لیا اے۔

پیڑ نے آکھیا کہ جہاز دا ملبہ موریشئن توں 22.

5کلو میٹر دی دوری اُتے اک اجیہے جزیرے اُتے موجود اے جیہدی پہلے کدی بھال نہیں کیتی گئی۔

انجینئر دا کہنا سی کہ حکام نے ایس جہاز نوں لبھن توں ایس لئی انکار کیتا کہ جہاز دے ملبے اُتے گولیاں دے نشان نیں، آسٹریلیوی انجینئر پیٹر ایس توں پہلاں وی کریش ہوئیاں کئی اُڈاناں دی کھوج لا چکیا اے۔

پیٹر دا دعوا اے کہ جہاز دی بھال کرن تے اوہدے بارے کھوج کرن لئی جیہڑے چار امریکی افسراں نوں گھلیا گیا سی اوہناں نے کئی معلومات لُکائیاں ، اوہناں نے ایس گل نوں یقینی بنایا کہ حاصل کیتیاں گئیاں ساریاں معلومات نوں لوکائی ایتھوں تیکر کہ ساڈی حکومت توں وی لُکایا گیا، پر اِنج کیوں کیتا گیا؟۔

پیٹر دا کہنا سی کہ اوہناں بندیاں نے ایس گولیاں نال بھرے جہاز دے ملبے دے برآمد ہون دی کوئی اطلاع نہیں دتی کیونکہ اوہ جاندے سن کہ اوہدے برآمد ہوندے ای اک نویں انکوائری شروع ہو جائے گی۔

پیٹر نے آکھیا کہ میں ایہ ساریاں معلومات آسٹریلیا دی ٹرانسپورٹ اینڈ سیفٹی بیورو نوں گھل دتیاں نیں۔