پاکستان نال جنگ نہیں مفاہمت دے حامی آں:بھارت

نویں دِلی(پاکستان پوائنٹ نیوز21۔فروری2017ء) بھارتی وزیر داخلا راجناتھ سنگھ نے آکھیا اے کہ پاکستان بھارت دا گوانڈھی ملک اے چھیتی ای دوویں ملکاں وچکار تعلقات بہتر ہون گے تے رشتے وی مضبوط ہو سکدے نیں۔

بھارتی میڈیا دے مطابق پرچا کاراں نال گل بات کردے ہوئے وزیر داخلا راجناتھ سنگھ نے آکھیا کہ پاکستان وچ دہشت گردی دے جو واقعات ہوئے نیں تے عام شہریاں دیاں جاناں ضائع ہو رہیاں نیں بھارت نوں ایس اُتے افسوس اے پر پاکستان نے دہشت گرد دا بیج بویا اے اوہ اوہدا پَھل وی وڈھ رہیااے۔

پاکستان ولوں بھارت اُتے لائے گئے الزاماں نوں رد کردے ہوئے وزیر داخلا نے آکھیاکہ بھارت ولوں پہلی گولی نہیں چلائی جائے گی۔

بھارت اک امن پسند ملک اے تے کسے خلاف وی جارحیت دے اراردے نہیں رکھدا پر جے ملک دی سلامتی تے آپ مختاری اُتے کسے نے للکارن

دی کوشش کیتی تے بھارت گولیاں نیں گنتی کرے گا بلکہ سخت کارروائی کیتی جائے گی۔

وزیر داخلا نے آکھیا کہ پاکستان تے بھارت گوانڈھی ملک نیں تے اسیں پاکستان نال چنگے گوانڈھیاں وانگ رہنا چاہندے نیں۔

اوہناں دا کہنا سی کہ اسیں مسائل نوں پرامن طریقے نال حل کرن دے خاہشمند آں پر ایس لئی ضروری اے کہ اک اجیہا ماحول قائم کیتا جائے جو کشیدگی تے تناﺅ توں پاک ہووے۔

اوہناں دا کہنا سی کہ بھات دیاں تجویزاں دا پاکستان مثبت جواب دیوے۔ مذاکرات دی پہلی کرن وچ اک منٹ وی ضائع نہیں کراں گے۔

وزیر داخلا نے آکھیاکہ اسیں پاکستان نال چنگے تعلقات قائم کرن لئی ہمیشہ سنجید آں پر اوس ملک دی قیادت دی ذمے واری اے کہ اوہ بھارت دیاں تجویزاں اُتے عمل کرے۔

بھارتی وزیر داخلا دا کہنا سی کہ ممبئی حملیاں وچ ملوث بندیاں نوں سزا دِتی جائے۔