بھارتی گجرات دے رہاشی نوجوان نے طلاق دی خشی وچ مٹھیائی ونڈی

بھارت(پاکستان پوائنٹ نیوز26۔اپریل2017ء) طلاق اک اجیہا فعل اے جو ہر بندے توں بڑا لُکا کے کیتا جاندا اے تاں جے گھٹ لوکاں نوں ایس حوالے نال خبر ہو سکے پر بھارتی شہر گجرات دے رہائشی اک نوجوان نے اپنی طلاق دی خشی ایس طرحاں منائی کہ دوست احباب سنے رشتے داراں نے وی اوہنوں طلاق دی مبارک باد تی۔

تفصیل دے مطابق گجرات دے علاقے راجکوٹ توں تعلق رکھن والے رنکیش نے اپنی طلاق دی خشی برفی ونڈ کے منائی۔ 26ورھیاں دے رنکیش نے 50کلو کاجو دی سپیشل برفی دے سپیشل ڈبے بنوائے جہناں اُتے `to celebrate divroce` لکھیا سی۔

میڈیا نال گل بات کردے ہوئے رنکیش نے آکھیا کہ اک سال دی شادی دے تشدد تے دو سال طلاق دی رجسٹریشن لئی دھکے کھان مگروں آخیر طلاق مل جانا کسے انعام توں گھٹ نہیں

اے۔

مٹھیائی دے ڈبے اُتے ایہ وی لکھیا سی کہ اوہ قانون جو سوانی دی حفاظت کردا اے کئی لوک اوہدا غلط فائدا چُکدے نیں۔

رنکیش نے دسیا کہ مینوں طلاق لین لئی دو سال لگے کیونکہ طلاق بدلے کُڑی ولوں منگے گئے پیسے میں نہیں دے سکدا سی تے چنگے توں چنگا وکیل وی ایس سلسلے وچ میری کوئی مدد نہیں کر سکیا پر جیویں ای طلاق لئی قانونی کارروائی ختم ہوئی، میرے سارے رشتے داراں نے مینوں مبارکباد دتی۔

رنکیش دی ایہ کہانی تے طلاق دی خبر سوشل میڈیا اُتے وی مقبول ہوئی۔ سوشل میڈیا ورتیندڑاں نے خشی وچ کیتے گئے رنکیش دے اقدام نوں تنقید دا نشانا وی بنایا اے پر ایہ خبر وائرل ہون مگروں سوشل میڈیا اُتے موجود اجنبی وی رنکیش نوں مبارکاں دے رہے نیں۔