سڈنی(پاکستان پوائنٹ نیوز02۔جنوری2017ء) قومی ٹیسٹ ٹیم دے کپتان مصباح الحق نے ریٹائرمنٹ دیاں خبراں نوں رَد کردے ہوئے آکھیا کہ اوہناں دا فوکس ایس ویلے سڈنی ٹیسٹ اُتے اے۔
تفصیل دے مطابق آسٹریلیا خلاف تیجے تے آخری ٹیسٹ میچ توں پہلے میڈیا نال گل بات کردے ہوئے مصباح الحق نے اپنی ریٹائرمنٹ لین دیاں خبراں نوں رَد کردے ہوئے آکھیا کہ اوہ 2016سی جدکہ ہن 2017اے۔
اوہناں دا کہنا سی کہ ریٹائرمنٹ لین دی گل بہت مایوسی وچ کیتی سی پر ہن ایہ گل پرانی ہو گئی اے۔ مصباح دا کہنا سی کہ ایس ویلے میرا سارا فوکس سڈنی ٹیسٹ اُتے اے، جے ریٹائرمنٹ بارے فیصلا کر لیا ہوندا تے ایتھے نہ ہوندا۔
مصباح الحق دا ہور کہنا سی کہ ٹیم دوویں ٹیسٹ میچاں وچ بہتر کھیڈی، برسبین ٹیسٹ وچ اہم جِت دے بڑے نیڑے پہنچ گئے ساں تے میلبورن ٹیسٹ وچ وی کھڈاریاں نے چنگی بیٹنگ کیتی پر بارش دی وجہ توں سانوں ڈاڈھی پریشانی دا ساہمنا کرنا پیا۔
وسیلیاں دے مطابق مصباح الحق قومی ٹیم دی ملک واپسی اُتے پی سی بی چیئرمین شہریار خان نال ملاقات کرن دے بعدا پنے آن والے ویلے بارے کوئی فیصلا کرن گے۔
آسٹریلیا دے دورے وچ بار بار ناکامی توں وکھ مصباح الحق نوں ناقص فارم نے وی ڈاڈھا پریشان کیتا ہویا اے، اوہ 4اننگز وچ صرف 20سکور کرن وچ کامیاب ہو سکے نیں جدکہ نیوزی لینڈ تے کینگروز خلاف 6اننگز وچ اوہناں نے 10.
67دی اوسط نال 64سکور کیتے نیں۔
آسٹریلیا خلاف سیریز دے بعد پاکستان نوں اپریل وچ ویسٹ انڈیز خلاف سیریز کھیڈنی اے جہدے لئی لائحہ عمل بورڈ چیئرمین شہریار خان تے مصباح الحق وچکار ملاقات دوران طے کیتا جائے گا۔
شہریار خان دی خاہش اے کہ مصباح الحق ہور کجھ چِر ملک دی نمائندگی کرن تے ٹیسٹ کرکٹ چھڈن دا خیال دلوں کڈھ دین۔ شہریار خان ایس سلسلے وچ مصباح الحق تے سینئر کھڈاری یونس خان نوں ہور اک سال تیکر کرکٹ کھیڈن دی درخاست وی کر چکے نیں تے امید کیتی جا رہی اے کہ آئندہ ملاقات وچ شہریار خان اوہناں نوں اک وار فیر ریٹائرمنٹ توں باز رکھن وچ کامیاب ہو جان گے۔