مشکل کنڈیشنز وچ کامیابی لئی یاسر شاہ نوں کریز دی ورتوں تے گیند دی سپیڈ وچ کمی پیشی کرنا سکھنی ہووے گی: عبدالقادر

لاہور(پاکستان پوائنٹ نیوز21۔دسمبر2016ء) عظیم سپنر ماسٹر عبدالقادر دا کہنا اے کہ مشکل کنڈیشنز وچ کامیابی حاصل کرن لئی لیگ سپنر یاسر شاہ نوں کریز دی ورتوں تے گیند دی سپیڈ وچ کمی پیشی لیانی سکھنی ہووے گی۔

تفصیل دے مطابق میڈیا نال گل بات کردے ہوئے 61ورھیاں دے گگلی ماسٹر دا کہنا سی کہ 30ورھیاں دے لیگ سپنر نوں مختلف قسم دیاں پچاں اُتے وکٹاں لین وچ مہارت حاصل کرنی ہووے گی، جہدے لئی اوہنوں اپنی گگلی تے فلپر اُتے کم کرنا ہووے گا۔

عبدالقادر دا کہنا سی کہ یاسر شاہ نوں انگلینڈ تے آسٹریلیا دیاں پچاں اُتے ایڈجسٹ ہون وچ اوکڑاں پیش آ رہیاں نیں جہدے پاروں اوہ وکٹاں وی نہیں لے رہے، اوہنوں کریز دی ورتوں تے گیند دی سپیڈ وچ کمی پیشی کرنی سکھنی ہووے گی جدکہ ایہدے نال اوہنوں سٹیو سمتھ ورگے بلے باز نوں آﺅٹ کرن لئی پلان وی بنانا ہووے گا جو ہر چنگے سپنر دی وڈیائی اے۔

لیجنڈری لیگ سپنر دا ہور کہنا سی کہ یاسر اک میچ ونر باﺅلر اے جہنے یو اے ای تے انگلینڈ وچ اپنے آپ نوں منوایا، ملیبورن تے سڈنی دیاں پچاں یاسر دی بہتی مدد کرن گیاں ، جے اوہ اپنی پرفارمنس نال اوتھے پاکستان نوں جتوان وچ کامیاب ہو گیا تے حقیقی معنیاں وچ دنیا دا بہترین سپنر بن جائے گا۔

یاد رہوے کہ 2015وچ یاسر شاہ نے 7میچاں وچ 23دی اوسط نال 49وکٹاں لئیاں سن جدکہ 2016وچ اوہ ہن تیکر 9میچاں وچ 36.

58دی اوسط نال 43وکٹاں لے چکیا اے۔

یاسر شاہ نے اپنے ٹیسٹ کیریئر دے پہلے 13میچاں وچ 86شکار کیتے سن پر اپنے 8آخری ٹیسٹ میچاں وچ اوہ صرف 33وکٹاں لین وچ کامیاب رہے۔