کراچی(پاکستان پوائنٹ نیوز13۔جولائی2017ء) قومی ٹیم دے کپتان سرفراز احمد دا کہنا اے کہ ملک اندر انٹرنیشنل کرکٹ نہ ہون کارن سانوں نقصان ہو رہیا اے، اسیں چیمپئنز ٹرافی دی جِت اُتے نہیں رُکاں گے بلکہ کارکرگی بہتر بنان دی کوشش کردے رہواں گے۔
کراچی پرس کلب وچ پرچا کاراں نال گل بات کردے ہوئے سرفراز احمد دا کہنا سی کہ چیمپئنز ٹرافی جِتن مگروں پاکستانی لوکائی دیاں امیداں ودھ گئیاں نیں۔
اللہ تعالی دی مدد ، لوکائی تے ماں پیو دیاں دعاواں نال کامیابی ملی اے پر اسیں ہن اگانہ ودھنا اے تے ہور جِتنا اے۔
اوہناں دا کہنا سی کہ میرا نشانا ٹیم وچ مستقل مزاجی لیانا
اے۔ پچھلے ڈیڈھ سال توں شیواں بہتر ہوئیاں نیں۔ جِت کسے اک دی نہیں پورے پاکستان دی اے۔
جِت نال پاکستانی کرکٹ وچ اک نویں جان پئی اے۔سرفراز احمد دا کہنا سی کہ کھڈاریاں اُتے تنقید ضرور کرو۔ اسیں وی اپنے آپ نوں ٹھیک کرنے آں۔
کھڈاریاں پچھے جو لوک محنت کردے نیں سانوں اوہناں نوں وی یاد رکھنا چاہیدا۔ سرفراز دا ہور کہنا سی کہ ٹیم سینئر تے جونیئر کھڈاریاں اُتے مشتمل اے جو چنگی گل اے۔
ٹیسٹ دی کپتانی چیلنج اے، یونس خان تے مصباح الحق دی کمی محسوس ضرور ہوئے گی کیونکہ ٹیم نوں سینئر کھڈاریاں دی ہمیشہ ضرورت رہندی اے۔ میں وی سینئرز توں مشورے لینا واں۔