کولکتہ(پاکستان پوائنٹ نیوز24۔اپریل2017ء) بھارت وچ کرکٹ میچ دے نتیجے اُتے لائی گئی شرط نے12ورھیاں دے بال دی جان لے لئی۔
بھارتی میڈیا دے مطابق مغربی بنگال دی ڈسٹرکٹ ہاﺅرا وچ کرکٹ میچ دے نتیجے اُتے 250رُپئے دی شرط لا کے ہارن والے 12ورھیاں دے ملزم نے اپنے بیلی دی جان لے لئی۔
مقتول دے والد کہنیا پسون نے میڈیا نال گل بات کردے ہوئے آکھیا کہ میرے پُتر نے اپنے بیلی نال اک میچ دے نتیجے اُتے 250رُپئے دی شرط لائی تے شرط جتن اُتے اوہنے پیسے منگے پر قاتل نے پیسے دین توں انکار کر دتا۔
مقتول دے والد مطابق اوہدے پُتر نوں قتل کرن توں پہلاں اک باغ وچ لیجایا گیا جتھے اوہنوں ڈاڈھا زخمی کیتا گیا، جہدے مگروں اوہدے سِر وچ اِٹ ماری گئی تے اوہ ہلاک ہو گیا۔
مقتول دے والد دا ہور کہنا سی قاتل نے اوہدے پُتر دی لاش لاگے دے جنگل وچ جا کے جھاڑیاں دی مدد نال لُکان دی کوشش پر اوہ ناکام رہیا۔
مقتول دے والد نے آکھیا کہ میرا پُتر تے واپس نہیں آ سکدا پر قاتل نوں سزا ضرور ملنی چاہیدی۔ مقامی پولیس افسر دے مطابق ملزم تے اوہدے اک ساتھی نے تفتیش دوران جرم قبول کر لیا۔