پی سی بی کولوں کوئی الوداعی میچ نہیں چاہندا، میڈیا ساتھ دیوے تے سیاسی جماعت بناواں گا: شاہد آفریدی

کراچی(پاکستان پوائنٹ نیوز13۔اپریل2017ء) سابق کپتان شاہد آفریدی نے آکھیا اے کہ جے میڈیا ساتھ دیوے تے اپنی سیاسی جماعت بنا سکنا واں، جو پیار ملیا لوکائی توں ملیا، پی سی بی توں کوئی امید نہیں، مینوں پی سی بی کولوں الوداعی میچ نہیں چاہیدا۔

تفصیل دے مطابق میڈیا نال گل بات کردے ہوئے شاہد آفریدی دا کہنا سی کہ میرا کسے سیاسی جماعت نال تعلق نہیں، سیاستدان دا کم لوکاں دی خدمت کرنا اے۔

اک سوال دے جواب وچ اوہناں دا کہنا سی کہ جے میڈیا ساتھ دیوے تے میں سیاسی جماعت بنا لواں گا۔ اوہناں نے ہور آکھیا کہ کھڈاری غلط کم کر کے اپنی عزت برقرار نہیں رکھ سکدے۔

اوہناں دا کہنا سی کہ سانوں کھڈاریاں

دی لوڑ اے۔ شاہد آفریدی نے آکھیا کہ میرا تعلق کراچی توں اے ایس لئی کراچی کنگز دا حصہ واں، پی سی بی نوں یاد رکھنا چاہیدا کہ کھڈاری دی وجہ توں بورڈ اے۔

اوہناں دا کہنا سی کہ مینوں کرکٹ بورڈ کولوں کوئی الوداعی میچ یاں سیریز نہیں چاہیدی، جِنی عزت لوکائی نے دتی میرے لئی بتھیری اے۔

اوہناں دا کہنا سی کہ سرفراز دی کارکردگی چنگی اے اوہ ٹیم نوں نال لے کے ٹُرے گا، ویسٹ انڈیز خلاف قومی ٹیم دا چنگا پرفارم کرنا چنگی گل اے، کرکٹ فاسٹ ہو گئی اے ایس لئی سانوں وی ویلے نال ٹُرنا چاہیدا۔

سابق کپتان نے ریٹائرمنٹ دے حوالے نال سوال اُتے آکھیا کہ مصباح الحق تے یونس خان نے چنگا فیصلا کیتا۔