پاناما لیکس کیس: سپریم کورٹ وچ وزیر اعظم نواز شریف دے وکیل مخدوم علی خان دے دلائل مکمل خواجا سعد رفیق دی شیخ رشید بارے دِتے گئے بیان اُتے معذرت، مینوں شیخ رشیدبارے ایس طرحاں دے الفاظ نہیں ورتنے چاہیدے سن: خواجا سعد رفیق دی میڈیا نال گل بات

اسلام آباد(پاکستان پوائنٹ نیوز19۔جنوری2017ء) سپریم کورٹ وچ پاناما لیکس بارے کیس دی سنوائی روز ہو رہی اے۔ تفصیل دے طابق سپریم کورٹ وچ اج وزیر اعظم نواز شریف دے وکیل مخدوم علی خان نے اپنے دلائل مکمل کر لئے۔

سپریم کورٹ دے باہر میڈیا نال گل بات کردے ہوئے وفاقی وزیر ریلوے خواجا سعد رفیق نے آکھیا کہ عدالت نے باہر باہر عدالت لان توں پرہیز کرن دی ہدایت کیتی ہوئی اے۔

اوہناں نے آکھیاکہ تحریک انصاف عدالتی کارروائی نوں وقفے دے بعد باہر آکے مسخ کر دیندی اے۔ تحریک انصاف ایہو حکمت عملی الیکشن کمیشن دے باہر وی کردی رہی اے۔

اوہناں نے آکھیا کہ اسیں باہر جو کُجھ کردے آں اوہدے ردعمل دے طور اُتے کرنے اں۔ سعد رفیق دا کہنا سی کہ مخالفاں ولوں عدالت نوں دباءوچ لیان دی کوشش کیتی جا رہی اے، پاکستان تحریک انصاف دے مقصد پاناما کیس وچ سیاست کرنا اے۔

اوہناں نے آکھیا کہ ساڈے خاندان نے عدالتاں دی سربلندی لئی کوششاں کیتیاں۔ سعد رفیق دا کہنا سی کہ عدالتاں دی آزادی دے بغیر قوم

زندا نہیں رہ سکدی، کسے سیاسی جماعت نوں بنن وچ 40توں 50ورھے لگدے نیں۔

پاکستان تحریک انصاف نے سچ تے جھوٹھ بولن دی تمیز ختم کر دِتی اے۔ اوہناں نے آکھیا کہ ایہ سوچنا اے کہ اسیں پاکستان نوں کیہ دے رہے آں؟ کیہ عدالتی کارروائی نوں گمراہ کن انداز وچ پیش کرنا عدالت دی توہین نہیں؟ اوہناں نے مطالبا کیتا کہ عدالت نوں معاملے دا آپ نوٹس لینا چاہیدا۔

پی ٹی آئی رہنماواں نوں تنقید دا نشانا بناندے ہوئے اوہناں نے آکھیاکہ جدوں اسیں گل کردے آں تے آکھدے نیں وزیر آ جاندے نیں، ایہناں نوں ایہ نہیں پتا وزیر وی انسان نیں، وزیر وی سیاسی ورکرز ہوندے نیں۔

خواجا سعد رفیق نے آکھیا کہ کیہ اسیں کردار کشی وچ اگانہ نہیں ودھ گئے؟ اوہناں نے پچھلے دیہاڑے عوامی مسلم لیگ دے سربراہ شیخ رشید بارے سخت بیان دین اُتے معذرت کردے ہوئے آکھیا کہ مینوں شیخ رشید بارے ایس طرحاں دے الفاظ نہیں آکھنے چاہیدے سن۔

اوہناں نے آکھیاکہ پچھلے دیہاڑے شیخ رشید بارے سخت گل کیتی جہدا مینوں افسوس اے۔