ڈیوس اجلاس: ورلڈ اکنامک فورم دی راحیل شریف نوں اجلاس وچ رلت دی دعوت جنرل (ر) راحیل شریف اجلاس وچ دہشت گردی دے موضوع اُتے خطاب کرن گے

اسلام آباد(پاکستان پوائنٹ نیوز14۔جنوری2017ء) جنرل (ر) راحیل شریف نوںڈیوس وچ ہونو الے ورلڈ اکنامک فورم (ڈبلیو ای ایف) دے سالانا اجلاس وچ رلت لئی سَدا دتا گیا اے۔

تفصیل دے مطابق دہشت گردی خلاف جنگ وچ اپنا لوہا منوان تے اپنیاں صلاحتاں پاروں مشہور ہون والے راحیل شریف ڈیوس وچ ہون والے اجلاس دوران دہشت گردی دے موضوع اُتے خطاب کرن گے۔

ایس اجلاس دی سانجھی صدارت بنک آف امریکا دے برائن ٹی موئنہان، پاکستان لئی آسکر ایوارڈ جِتن والی شرمین عبید چنائے، ڈنمارک دی سابق وزیر اعظم ہیلے تھورننگ شمت، نیدر لینڈ دی کاروباری شخصیت فرانس وین ہوتن تے امریکا دی کاروباری و سماجی سوانی میگ و ٹمین کرن گے۔

ڈیوس وچ ہون والے ورلڈ اکنامک فورم دے ایس سالانا اجلاس وچ وزیر اعظم میاں محمد نواز شریف پاکستانی وفد دی سربراہی کرن گے۔

ایس فورم دے سالانا اجلاس دی تواریخ وچ انج پہلی وار ہویا اے کہ پاکستان دے سابق آرمی چیف نوں فورم دے اجلاس وچ ِبُلایا گیا ہوئے۔

ایس توں پہلے جنرل

پرویز مشرف صدر دی حیثیت نال فورم نال خطاب کر چکے نیں۔ اکنامک فورم دے ترجمان نے ایس گل دی تصدیق کیتی اے کہ جنرل(ر) راحیل شریف 17جنوری نوں ہون والے اینوٹ دے سیشنز وچ خطاب کرن گے۔

اک سیشن وچ ’ڈیجیٹل دور وچ دہشت گردی‘ اندر القاعدہ، داعش تے بوکو حرام خلاف ’غیر منظم کوششاں‘ تے بین الاقوامی سکیورٹی وچ ذمے وارانا قیادت اُتے بحث ہوو ے گی۔

ذکر کیتے گئے سیشن وچ ہدف نوں نشانا بنان، اپنے وسائل دی نگرانی تے آوا جاوی نوں منظم کرن لئی ڈیجیٹل نیٹ ورک نوں ورتن والیاں دہشت گرد تنظیماں نال نبڑن دے طریقیاں اُتے غور کیتا جائے گا۔

ایس سیشن وچ اقوام متحدہ دے اسسٹنٹ سیکرٹری جنرل تے انسداد دہشت گردی دے ایکزیکٹیو ڈائریکٹر جین بال لیبرڈے وی رلت کرن گے۔

ایس توں وکھ نائیجریا دے نائب صدر یامی اوسن باجو، سعودی شہزادے ترکی الفیصل السعود، یورپول دے ڈائریکٹر روب وین رائٹ رلت کرن گے جدکہ آکسفوڈ یونیورسٹی دے وائس چانسلر رچرڈسن سیشن دی نظامت دے فرض نبھان گے۔