عجیب بھلا مانس وزیر اعظم اے جہنوں پتا ای نہیں کہ میرے بال ارب پتی ہو گئے نیں: عمران خان

اسلام آباد(پاکستان پوائنٹ نیوز13۔جنوری2017ء) سپریم کورٹ وچ پاناما کیس بارے درخاستاں دی سنوائی دا سلسلا جاری اے۔ اج دی سنوائی دوران وزیر اعظم دے وکیل مخدوم علی خان نے دلائل پیش کیتے۔

جہدے بعد سپریم کورٹ نے کیس دی ہور سنوائی پیر تک ملتوی کر دِتی۔ سپریم کورٹ دے باہر میڈیا نال گل بات کردے ہوئے پی ٹی آئی چیئرمین عمران خان نے آکھیا کہ پاناما وچ شامل سارے رہنماواں نے جواب جمع کروا دِتے۔

اوہناں نے آکھیا کہ اپنی ملکیت بارے جواب دینا وزیر اعظم دی ذمے واری اے پر وزیر اعظم ثبوت دین توں نس رہے نیں، وزیر اعظم نے آکھیا سی کہ میرے کول ہر گل دا ثبوت موجود اے۔

عمران خان دا کہنا سی کہ جمہوریت وچ وزیر اعظم جواب دین دا ذمے وار ہوندا اے، دنیا بھر وچ لوکائی نوں جواب دِتا جاندا اے، وزیر اعظم نے خطاب وچ آکھیا سی کہ جائیداد دی ملکیت دے سارے ثبوت موجود نیں۔

اوہناں نے آکھیا کہ جے وزیر اعظم اپنے آپ اُتے لگے الزاماں دا جواب دے رہے نیں تے میرے اُتے احسان نہیں کر رہے کیونکہ ملک دے وزیر اعظم نوں صادق و امین ہوناچاہیدا پر ایتھے ارباں رُپئے دی دولت

لُکان لئی جھوٹھ بولیا جا رہیا اے۔

اوہناں نے آکھیا کہ ڈکٹیٹر لوکائی نوں جواب نہیں دیندا پر جمہوریت اندر وزیراعظم جواب ضرور دیندا اے۔ پی ٹی آئی چیئرمین نے آکھیا کہ ثبوت موجود ہون دا آکھ کے ہن ایہ لوک عدالتوں نَس رہے نیں، آکھدے نیں ایہ عدالت فیصلا ای نہیں کر سکدی۔

اوہناں نے آکھیا کہ ایہ لوک آکھدے سن عدالت آﺅ اسیں آئے تے ہن ایہ نس رہے نیں۔ وزیر اعظم اُتے تنقید کردے ہوئے اوہناں نے آکھیا کہ ساڈا وزیر اعظم عجیب بھلا مانس اے جہنوں پتا ای نہیں کہ اوہدے بال ارب پتی ہو گئے نیں۔

عمران خان نے آکھیا کہ انج لگدا اے منی ٹریل ثابت کرن لئی چار گواہ لیانے پین گے،ایس ملک وچ صادق و امین بندے لبھنا بہت مشکل اے۔

عمران خان نے پیشکش کیتی کہ نیب دا ادارا میرے حوالے کر دیو، 3مہینیاں وچ وڈے وڈے چوراں نوں پھڑ کے وکھاواں گا۔ اوہناں دا کہنا سی کہ نیب آرڈیننس نوں نہیں وزیر اعظم نوں بدلن دی لوڑ اے۔

اوہناں نے آکھیا کہ پہلے اوہناں نے مَنیا کہ لندن وچ موجود فلیٹ ساڈے نیں، فلیٹس دی ملکیت قبول کرن دے بعد ہن ثبوت دینا اوہناں دی ذمے واری اے۔