اسلام آباد(پاکستان پوائنٹ نیوز01۔دسمبر2016ء) پاکستان تحریک انصاف دے چیئرمین عمران خان نے وزیر اعظم نواز شریف تے نویں چُنے گئے امریکی صدر ڈونلڈ ٹرمپ دی ٹیلی فونک گل بات اُتے تبصرا کردے ہوئے آکھیا اے کہ ٹرمپ وی نواز شریف نوں پاناما سکینڈل توں نہیں بچا سکدا۔
تفصیل دے مطابق سماجی رابطے دی ویب سائٹ ٹوئٹر اُتے اپنے پیغام وچ عمران خان دا کہنا سی کہ چنگی خبر ایہ اے کہ ٹرمپ تے نواز شریف دی گل بات ہوئی پر وزیر اعظم نواز شریف لئی بُری خبر ایہ اے کہ ٹرمپ وی اوہناں نوں پاناما سکینڈل توں نہیں بچا سکے گا بھاویں اوہدا کوئی خط ای کیوں نہ آ جائے۔
یاد رہوے کہ پچھلے دیہاڑے وزیر اعظم نواز شریف نے ڈونلڈ ٹرمپ نوں فون کر کے اوہناں نوں امریکی صدر بنن اُتے مبارکباد دِتی سی جدکہ منتخب امریکی صدر نے نواز شریف نوں سلاہندے ہوئے اوہناں نال جلدی ملن دی
خاہش دا اظہار کیتا سی۔
وزیر اعظم نواز شریف نے امریکی صدر نوں پاکستان دے دورے دی دعوت وی دِتی سی، جہدے اُتے ٹرمپ دا کہنا سی کہ اوہ پاکستان دا دورا ضرور کرن گے۔
دوجے پاسے اپنے ٹویٹ وچ ڈونلڈ ٹرمپ دے خط دا ذکر کرکے عمران خان نے قطر دے سابق وزیر خارجا شہزادا حماد بن جاسم بن جبر الثانی دے اوس تحریری بیان اُتے تنقید وی کر دِتی، جہنوں سپریم کورٹ وچ پانانا لیکس اُتے درخاستاں دی سنوائی دے دوران وزیر اعظم نواز شریف دے بالاں دے وکیل اکرم شیخ نے 15نومبر نوں پیش کیتا سی۔
اوہدے بعد ہر اک دی زبان اُتے قطر توں آن والے ایس خط دے ای چرچے نیں جدکہ شہزادا حماد بن جاسم دا خط راہیں کہنا سی کہ اوہناں دے والد تے نواز شریف دے والد وچکار لَمے چِر توں کاروباری تعلقات سن تے اوہناں دے وڈے بھرا شریف فیملی تے اوہناں دے کاروبار دے منتظم سن۔