پہلی دسمبر توں پٹرولیم وستاں دیاں قیمتاں وچ کمی دا امکان پٹرول تے ڈیزل گھٹو گھٹ 10رُپئے فی لیٹر تیکر سستا ہوسکدا
اسلام آباد(پاکستان پوائنٹ نیوز22۔نومبر۔2018ء) پاکستان وچ پہلی دسمبر توں پٹرولیم وستاں دیاں قیمتاں وچ کمی دا امکان اے۔
تفصیل دے مطابق عالمی منڈی وچ خام تیل ہور سستا ہون نال پاکستان وچ وی قیمتاں گھٹ ہون دی آس جاگ گئی اے۔ پاکستان وچ پٹرول تے ڈیزل گھٹو گھٹ دس رُپئے فی لیٹر تیکر سستا ہو سکدا اے۔
عالمی منڈی وچ خام تیل دی قیمت 86ڈالر توں 62ڈالر 53سینٹ فی بیرل ہو گئی اے۔ عالمی
منڈی وچ خام تیل دی ایہ قیمت 9مہینے دی گھٹ ترین سطح اُتے اے۔
4اکتوبر توں ہن تیکر خام تیل دی قیمت وچ 24ڈالر فی بیرل کمی ہوئی۔ چار اکتوبر نوں خام تیل دی عالمی قیمت 86ڈالر فی بیرل سی۔
یاد رہوے کہ پچھلے ڈیڈھ مہینے توں خام تیل دی قیمت وچ لگاتار کمی ہو رہی اے۔ عالمی قیمت وچ کمی دی وجہ توں پاکستان وچ وی پٹرول تے ڈیزل گھٹو گھٹ 10رُپئے فی لیٹر تیکر سستا ہوسکدا اے۔