وزیر اعظم عمران خان حضرت عیسی بارے حقائق دے اُلٹ بیان دے بیٹھے،ویڈیو وائرل
اسلام آباد(پاکستان پوائنٹ نیوز20۔نومبر۔2018ء) وزیر اعظم عمران خان عالمی رحمت العالمین دے افتتاحی سیشن وچ حضرت عیسی بارے حقائق دے اُلٹ بیان دے بیٹھے۔
تفصیل مطابق منگل نوں دو دن جاری رہن والی عالمی رحمت اللعالمین کانفرنس دے افتتاحی اجلاس نال خطاب کردے ہوئے وزیر اعظم عمران خان نے کسے لکھی ہوئی تقریر دا سہارا لِتے بغیر فی البدیہ انداز وچ سیرت طیبہ دے کئی پہلوواں نوں اُجاگر کیتا۔
خاص کر اوہناں نے آپ ولوں اپنے صحابہ کرام دی کردار سازی دے بارے گل بات کردے ہوئے آکھیا کہ سانوں ساریاں نوں ایہ ویکھن دی ضرورت اے کہ حضور نے کس طرحاں اپنے ساتھیاں دی کردار سازی کیتی، جیہدی وجہ توں رومی تے ایرانی سلطنتاں مسلماناں ساہمنے سرنگوں ہوئیاں۔
عمران خان نے سیرت
طیبہ دے حوالے نال ملک دیاں تن وڈیاں یونیورسٹیاں وچ سیرت چیئرز قائم کرن دا اعلان کردے ہوئے آکھیا کہ سبھ توں پہلی ضرورت ایس گل دی اے کہ ایس گل اُتے تحقیق کیتی جائے کہ کس طرحاں آپ نے اپنے صحابہ کرام دی تربیت کیتی تے تھوڑے ویلے وچ اوہناں دیاں کامیابیاں دی وجہ توں اسلامی سلطنت مراکش توں وسطی ایشیا تیکر کھلر گئی۔
ایس موقعے تے اوہناں نے ایہ وی آکھیا کہ رب دے بہت سارے پیغمبر دنیا وچ آئے پر انسانی تاریخ وچ اوہناں دا ذکر نہیں ملدا۔
جیویں کہ حضرت موسی علیہ السلام دا ذکر قرآن پاک وچ ملدا اے پر حضرت عیسی دا تے تاریخ وچ ذکر نہیں ملدا۔ اوہناں دا ایہ بیان اج دے خطاب دا جھیڑوا(متنازعہ) ترین حصہ بن گیا اے ،جیہدے کلپ سوشل میڈیا اُتے وائرل ہو رہے نیں۔