پہلی دسمبر توں پٹرولیم وستاں دیاں قیمتاں وچ کمی دا امکان

اسلام آباد(پاکستان پوائنٹ نیوز13۔نومبر۔2018ء) پہلی دسمبر توں پٹرولیم وستاں دیاں قیمتاں وچ کمی دا امکان، عالمی منڈی وچ خام تیل دیاں قیمتاں وچ لگاتار کمی دی وجہ توں پاکستان وچ وی پٹرولیم وستاں(مصنوعات) سستیاں ہون دا امکان۔

تفصیل مطابق عالمی منڈی وچ خام تیل دیاں قیمتاں وچ کمی دا سلسلا جاری اے۔ عالمی منڈی وچ خام تیل دیاں قیمتاں وچ لگاتار کمی دی وجہ توں پاکستان وچ وی پٹرولیم وستاں سستیاں ہون دی پوری طرحاں آس اے۔

ماہرین دے مطابق پہلی نومبر توں عالمی منڈی وچ خام تیل دیاں قیمتاں گھٹنا شروع ہوئیاں ،

جیہدی سبھ توں وڈی وجہ ایرانی سپلائی تے بین الاقوامی سطح اُتے معاشی سست روی اے۔

امریکی خام تیل 1ڈالر 60سینٹس کمی مگروں 59ڈالر فی بیرل تے برطانوی خام تیل وی 1ڈالر60سینٹس کمی مگروں 69ڈالر36سینٹس فی بیرل وچ ٹریڈ کر رہیا اے۔

دو ہفتیاں وچکار عالمی منڈی وچ خام تیل 9فیصد یعنی 6ڈالر فی بیرل سستا ہو گیا اے۔ معاشی تجزیہ کاراں مطابق عالمی منڈی وچ خام تیل سستا ہون نال پاکستان وچ وی حکومت دسمبر وچ پٹرول تے ڈیزل دیاں قیمتاں وچ کمی دا اعلان کر سکدی اے جیہدے نال فیکٹریاں دی پیداواری لاگت وچ کمی ہوئے گی۔