10توں ودھ ارکان اسمبلی دی کرپشن دا انکشاف سابق تے موجودہ ارکان اسمبلی نے گھٹو گھٹ 1ارب30کروڑ رُپئے دی کرپشن کیتی
اسلام آباد(پاکستان پوائنٹ نیوز22۔اکتوبر۔2018ء) 10توں ودھ ارکان اسمبلی دی کرپشن دا انکشاف ہویا اے، ایس کرپشن دیاں تحقیقات شروع ہوگئیاں نیں۔
قومی اخبار وچ چھپن والی اک رپورٹ وچ دسیا گیا اے کہ کرپشن کرن والے سابق تے موجودہ ارکان اسمبلی وچ لیگی ارکان وی شامل نیں،جیہناں خلاف گھیرا تنگ کیتا جا رہیا اے۔
رپورٹ وچ دسیا گیا کہ لیگی ارکان اسمبلی ولوں اک ارب 30کروڑ رُپئے دی ایہ کرپشن صرف اک مالی سال دوران کیتی گئی اے۔
کرپشن کرن والیاں وچ 9سابق تے 3موجودہ ارکان اسمبلی شامل نیں جو کہ 25جولائی 2018نوں ہون والے عام
انتخابات وچ فیر چُنے گئے۔
اینٹی کرپشن ڈیپارٹمنٹ نے کافی حد تیکر ایہناں ارکان دی کرپشن بارے ریکارڈ وی حاصل کر لیا اے۔ وسیلیاں مطابق ایہ کرپشن وڈے ترقیاتی منصوبیاں وچ کمیشن تے سرکاری ہسپتالاں وچ مشینری تے دوائیاں مُل لین وچ کیتی گئی۔
سوا ارب رُپئے توں ودھ رقم دی کرپشن وچ اک سابق صوبائی وزیر وی ملوث اے۔ جیہناں نے تعمیر ہون والے اک سرکاری ہسپتال وچ کرپشن کیتی۔
مسلم لیگ (ن) دے اک سابق رکن صوبائی اسمبلی، جو اک سرکاری ادارے دے وی چیئرمین سن، نے صرف اک سال وچ اکلے ای 20کروڑ توں ودھ دی کرپشن کیتی۔