اسلام آباد(پاکستان پوائنٹ نیوز29۔ستمبر۔2018ء) اقتصادی امور ڈویژن وچ ملاقات لئی آئے کویتی وفد دے سربراہ دے بریف کیس دی چور ی وچ ملوث جوائنٹ سیکرٹری ای اے ڈی ضرار حیدر نوں ایف آئی اے دے حوالے کر دتا گیا،واقعے اُتے حکام نے کویتی وفد توں معذرت کیتی۔
تفصیل مطابق جمعے دی شام اقتصادی امور ڈویژن وچ ہون والے اجلاس وچ رلتی کویتی وفد دے سربراہ نے اجلاس ختم ہون مگروں اپنا بریف کیس چوری ہون دا انکشاف کیتا۔
جیہدے اُتے اجلاس دے رلتی (شرکاء) پریشان ہو گئے تے واقعے دا سخت نوٹس لیند ے ہوئے سیکرٹری اقتصادی امور ڈویژن غضنفر جیلانی نے
موقعے اُتے تحقیقات دی ہدایت دتی۔
وسیلیاں دا آکھنا اے کہ سی سی ٹی وی فوٹیج راہیں بریف کیس چوری کرن والے ای اے ڈی دے افسر دی نشان کاری کیتی گئی۔ وسیلیاں مطابق بریف کیس چوری کرن والے افسر دی شناخت جوائنٹ سیکرٹری اقتصادی امور ڈویژن ضرار حیدر دے ناں توں ہوئی اے،جیہدے اُتے سیکرٹری ای اے ڈی غضنفر جیلانی نے سخت ایکشن لیا تے کویتی وفد دے سربراہ دا بریف کیس چوری کرن والے جوائنٹ سیکرٹری خلاف کارروائی کردے ہوئے اوہناں نوں ایف آئی اے دے حوالے کر دتا۔
دوجے پاسے واقعے اُتے پاکستانی حکام نے کویتی وفد توں معذرت کیتی۔