وزیر اعظم ہاؤس نوں تعلیمی ادارہ بنان دا معاملا: پیپلز پارٹی رہنما نفیسہ شاہ نے وزیر اعظم نوں کھریاں کھریاں سُنا دتیاں

اسلام آباد(پاکستان پوائنٹ نیوز13۔ستمبر۔2018ء) وزیر اعظم ہاؤس نوں تعلیمی ادارہ بنان دے معاملے اُتے پیپلز پارٹی دی اہم رہنما نفیسہ شاہ نے وزیر اعظم نوں کھریاں کھریاں سُنا دتیاں۔

پیپلز پارٹی دی رہنما نفیسہ شاہ دا کہنا سی کہ ایہ وزیر اعظم ہاؤس اے، تہاڈی ذاتی جائیداد نہیں۔ جاؤ تے جا کے بنی گالا والے محل نوں تعلیمی ادارہ بناؤ۔

تفصیل مطابق وفاقی وزیر تعلیم شفقت محمود نے پریس کانفرنس نال خطاب کردے ہوئے آکھیا کہ حکومت نے فیصلا کیتا اے کہ وزیراعظم ہاؤس نوں پوسٹ گریجویٹ پڑھیاراں لئی اک اُچے درجے دا تعلیمی ادارہ بنائے جائے گا۔

وزیر اعظم ہاؤس اک ہزار 96کینال دا اے، جیہدے اُتے سالہوار(سالانہ) 47کروڑ رُپئے خرچا آؤند ا اے۔ ایس لئی اوہنوں اُچے درجے دا تعلیمی ادارہ بنان دا اعلان

کیتا گیا اے۔

اوہناں دا کہنا سی کہ وزیر اعظم ہاؤس نوں تعلیمی ادارہ بنان لئی وزیر اعظم ہاؤس پچھے موجود زمین اُتے اُساری(تعمیرات) ہوئے گی۔

اوہناں نے آکھیا کہ ہائر ایجوکیشن کمیشن دے چیئرمین ڈاکٹر طارق تے ڈاکٹر عطاء الرحمان رلکے ایہدا پلان تجویز کرن گے، جیہدے مگروں وزیر اعظم ہاؤس نوں اُچے درجے دا تعلیمی ادارہ یاں یونیورسٹی بنایا جائے گا تے ایہ ادارہ تعلیمی لحاظ نال وکھرا ہوئے گا۔

پر وزیر اعظم ہاؤس نوں تعلیمی ادارہ بنان اُتے پیپلز پارٹی دی اہم رہنما نفسیہ شاہ نے وزیر اعظم نوں کھریاں کھریاں سُنا دتیاں۔

پیپلز پارٹی دی رہنما نفیسہ شاہ دا کہنا سی کہ ایہ وزیر اعظم ہاؤس اے۔ تہاڈی ذاتی جائیداد نہیں۔ جاؤ تے جا کے بنی گالا والے محل نوں تعلیمی ادارہ بناؤ۔