اسلام آباد(پاکستان پوائنٹ نیوز28۔اگست۔2018ء) پاکستان پیپلز پارٹی دے شریک چیئرمین آصف زرداری نے سپریم کورٹ وچ بیان حلفی جمع کروا دتا، آصف زرداری نے سپریم کورٹ وچ اک صفحے دا بیان حلفی جمع کروایا، جیہدے وچ اقرار کیتا گیا کہ باہرلے ملک میری کوئی منقولہ یاں غیرمنقولہ جائیداد یاں کوئی بنک اکاؤنٹ نہیں اے۔
میڈیا رپورٹس مطابق سپریم کورٹ وچ این آر او قانون نال قومی خزانے نوں نقصان اپڑان دا معاملا سنوائی ہیٹھ اے۔ آصف زرداری نے این آر او مقدمیاں اُتے دائر
درخاست دے جواب وچ بیان حلفی جمع کروایا اے۔
بیان حلفی وچ اقرار کیتا گیا کہ باہرلے ملک میرا کوئی بنک اکاؤنٹ یاں کوئی جائیداد نہیں اے۔ دوجے پاسے ایف آئی اے آصف زرداری تے اوہناں دی بھین فریال تالپور خلاف جعلی بنک اکاؤنٹس راہیں 35ارب رُپئے دی منی لانڈرنگ دے کیس دیاں تحقیقات وی کر رہی اے۔
پچھلے دیہاڑے سابق صدر آصف علی زرداری تے اوہناں دی بھین تالپور وفاقی تحقیقاتی ادارے (ایف آئی اے) وچ پیش ہوئے تے منی لانڈرنگ کیس وچ اپنے بیان ریکارڈ کروائے۔