اپوزیشن الائنس دا امتحان وزیر اعظم دا الیکشن اے جے آصف زرداری دا ووٹ شہباز شریف نوں نہیں ملدا تے پتا لگ جائے گا اپوزیشن الائنس وچ بہت اختلافات نیں تے ایہ الائنس اگانہ ٹُردا ہویا وکھالی نہیں دیوے گا:حامد میر

اسلام آباد(پاکستان پوائنٹ نیوز14۔اگست۔2018ء) سینئر پرچا کار و تجزیہ نگار حامد میر نے آکھیا اے کہ اپوزیشن الائنس دا امتحان وزیراعظم دا الیکشن اے، جے آصف زرداری دا ووٹ شہباز شریف نوں نہیں ملدا تے پتا لگ جائے گا کہ اپوزیشن الائنس وچ بہت اختلافات نیں تے ایہ الائنس اگانہ ٹُردا ہویا وکھالی نہیں دیوے گا۔

اوہ نجی ٹی وی دے پروگرام وچ گل بات کررہے سن۔ اوہناں نے اک سوال کہ کیہ قومی اسمبلی وچ مسلم لیگ (ن) تے پیپلز پارٹی اکٹھیاں رہ سکن گیاں؟دے جواب وچ آکھیاکہ نویں اسمبلی وچ مینوں لگ رہیا اے کہ وزیر اعظم دا الیکشن ہوئے گا تے اوہدی بہت اہم گل ایہ ہوئے گی کہ آصف علی زرداری تے بلاول بھٹو شہباز شریف دی حمایت کردے نیں یاں نہیں؟کیونکہ ساریاں نوں پتا اے کہ قائدے قانون مطابق ایہدے لئی ووٹنگ تے ہونی نہیں بلکہ ایوان وچ ڈویژن ہوندی اے۔

سانوں ایس گل توں سمجھ آ جائے

گی جے شہباز شریف دے حق وچ آصف زرداری تے بلاول بھتو دا ووٹ جاندا اے تے ایہدا مطلب ایہ ہوئے گا کہ اپوزیشن اکٹھی اے۔

جے آصف زرداری تے بلاول بھٹو وچوں کوئی ایوان وچ نظر نہیں آؤندا تے ایتھوں پتا لگ جائے گا کہ اپوزیشن وچ اجے ڈاڈھے اختلافات نیں تے ایہ الائنس اگانہ ٹُردا ہویا وکھالی نہیں دیوے گا۔

حامد میر نے آکھیا کہ مینوں یقین اے کہ آصف زرداری تے بلاول بھٹو سپیکر و ڈپٹی سپیکر دے امیدوار نوں ووٹ پان لئی ضرورآن گے۔

اوہناں نے آکھیا کہ اپوزیشن الائنس دا امتحان وزیراعظم دا الیکشن اے ۔ ویکھن نوں عمران خان دے نمبر پورے نیں۔ جیہدی بنیاد اُتے اوہناں نے وزیر اعظم بن جانا اے۔

پر جے شہباز شریف نوں آصف زرداری دا ووٹ نہیں ملدا تے فیر ایہ اپوزیشن دے اتحاد لئی بڑی اہم گل ہوئے گی۔ ایتھوں پتا لگ جائے گا کہ اپوزیشن الائنس وچ ڈاڈھے اختلافات نیں۔