ڈالر دی قیمت ودھان گھٹان وچ انٹرنیشنل مافیا ملوث:رپورٹ پاکستان اندر موجود5 وڈے سرمایہ کار وی ایس گروپ تے مافیا دا حصہ :انکشاف

کراچی( پاکستان پوائنٹ نیوز21۔جولائی۔2018ء ) چالو ہفتے ڈالر دی قیمت وچ دو توں تن وار وادھا ہویا، جیہدے نال ڈالر 130رُپئے دی ریکارڈ سطح اُتے اپڑ گیا جدکہ پیسے دی قدر وچ کمی آئی۔

ڈالر دی ایس اُچی اُڈان وچ انٹرنیشنل مافیا دے ملوث ہون دے ثبوت ملے نیں۔ قومی اخبار وچ چھپن والی رپورٹ وچ دسیا گیا کہ ڈالر دی اُچی اُڈان وچ ملوث انٹرنیشنل مافیا پچھے پاکستان مخالف طاقتاں دا اہم کردار اے جدکہ پاکستان اندر موجود پنج وڈے سرمایہ کار وی ایس گروپ تے مافیا دا حصہ نیں۔

ڈالر کس ویلے کِنا مہنگا ہونا اے تے کس ویلے سستا، بااثر مافیا نہ صرف ایس بارے جانو ہوندا اے بلکہ ڈالر مہنگا ہون نال مارکیٹ توں غائب تے سستا ہون اُتے مارکیٹ وچ اک دن پہلے آ جاندا اے۔

وسیلیاں دا کہنا اے کہ ایس حوالے نال اہم قومی اداریاں نے اہم ثبوت اکٹھے کر لئے نیں۔ثبوتاں مگروں انکشاف ہویا اے کہ اک منصوبے دے تحت ڈالر نوں مہنگا کیتا جا رہیا اے۔

ایس انکشاف مطابق پاکستان اندر رُپئے دی قیمت نوں گھٹ کرن دا منصوبہ چھ مہینے پہلے ای بن گیا سی تے ایس منصوبے وچ دو وفاقی سابق وزیر، چھ بینکرز تے وڈے سرمایہ کار گروپ وی شامل سن۔

ایس حوالے نال لندن وچ اک اہم میٹنگ ہو گئی سی تے ایہدے وچ باقاعدہ اک انٹرنیشنل ادارے دے دو بندے

وی رلتی سن۔ وسیلیاں دا کہنا اے کہ جس ویلے ڈالر دی قیمت 115رُپئے سی، اوس ویلے ڈالر مہنگا کرن دی سازش وچ شامل مافیا نے ڈالر نوں مارکیٹ توں چُکنا شروع کر دتا سی تے اک پلاننگ دے تحت پاکستان اندر ایس طرحاں دی سرمایہ کاری کروائی گئی، جیہدیاں شرطاں وچ ایہ گل وی سی کہ پیسیاں دی واپسی تن مہینے مگروں ہوئے گی تے واپسی وچ پیسے ڈالرز وچ تے اوس ویلے دی قیمت دے مطابق دتے جان گے۔

وسیلیاں نے ایہ وی دعوا کیتا کہ جس ویلے ڈالر 128تیکر گیا، اودوں وی باقاعدہ مارکیٹ وچوں مافیا نے ڈالر غائب کیتا ۔

ایہدا تعلق اوسے گروہ نال سی جو پہلاں وی سابق وزیر خزانہ اسحاق ڈار دیاں اکھاں دا تار سی۔اک منصوبہ بندی دے تحت ڈالر دی قیمت صرف کُجھ دن لئی کُجھ گھٹ کیتی گئی سی فیر ایہدے مگروں ودھا دتی گئی۔

وسیلیاں دا کہنا اے کہ ڈالر دی قیمت ودھان والا مافیا تن شیواں اُتے کم کر رہیا اے،اک ایہ کہ اوہ پاکستانی معیشت نوں نقصان اپڑانا چاہندا اے ، دوجا پاکستانی قرضیاں نوں ودھانا تے تیجا پاکستان تحریک انصاف دی متوقع حکومت بنن دی صورت وچ اوہنوں معاشی طور اُتے نقصان اپڑانا۔

چیتے رہوے کہ ایس ویلے اوپن مارکیٹ وچ ڈالر 130رُپئے 10پیسے د اوک رہیا اے۔ ڈیلرز مطابق انٹر بنک مارکیٹ وچ ڈالر 128.50رُپئے دا ہو گیا اے۔