راولپنڈی( پاکستان پوائنٹ نیوز18۔جولائی۔2018ء ) مریم نواز نے اک وار فیر اڈیالا جیل چھڈن توں انکار کر دتا ، نواز شریف دی دھی مریم نواز نوں اڈیالا جیل چھڈ کے سہالا ریسٹ ہاؤس منتقل کرن دی آفر کیتی گئی سی۔
تفصیل مطابق بدھ دے دیہاڑے خبراں ساہمنے آئیاں کہ ایون فیلڈ ریفرنس کیس وچ سزا یافتہ پاکستان مسلم لیگ (ن) دے قائد و سابق وزیر اعظم نواز شریف دی دھی مریم نواز نوں سکیورٹی خدشیاں دی وجہ توں اڈیالا جیل توں سہالا ریسٹ ہاؤس منتقل کرن دا فیصلا کیتا گیا اے۔
سہالا ریسٹ ہاؤس نوں پہلے ای سب جیل قرار دے دتا گیا اے۔ میڈیا رپورٹ مطابق مریم نواز نوں آؤندے 24گھنٹیاں دوران اڈیالاجیل توں سہالا ریسٹ ہاؤس منتقل کرن دا فیصلا کیتا گیا اے۔
سہالا ریسٹ ہاؤس نوں
پہلے ای سب جیل قرار دے دتا گیا اے تے اوہدی سکیورٹی نوں وی الرٹ کر دتا گیا اے۔ حکام مطابق مریم نواز دی جیل توں ریسٹ ہاؤس منتقلی دا فیصلا سکیورٹی خدشیاں دی وجہ توں کیتا گیا اے۔
دوجے پاسے مریم نواز نے اک وار فیر اڈیالا جیل چھڈن توں انکار کر دتا اے۔ مریم نواز دا کہنا اے کہ اوہ کسے صورت اپنے والد نوں اڈیالا جیل وچ چھڈ کے نہیں جان گیاں۔
چیتے رہوے کہ مریم نواز نے دوجی وار سہالا ریسٹ ہاؤس منتقل ہون توں انکار کیتا اے۔ ایس توں پہلاں اوہناں نوں گرفتاری دے موقعے تے وی سہالا ریسٹ ہاؤس رکھن دی آفر کیتی گئی سی۔
پر مریم نواز نے اوس ویلے وی ایہ آفر رد کر دتی سی۔ جدکہ ہن مریم نواز نے سکیورٹی خدشیاں مگروں وی اڈیالا جیل چھڈن توں انکار کر دتا اے۔