لاہور( پاکستان پوائنٹ نیوز13۔جولائی۔2018ء ) نواز شریف تے مریم نواز دا جہازلاہور ائر پورٹ اُتے لینڈ کر گیااے۔ تفصیل مطابق نواز شریف تے مریم نواز دا جہاز لینڈ کر گیااے۔
مریم نواز تے نواز شریف اتحاد ائر ویز دی اُڈان وائے 243راہیں لاہور اپڑے نیں۔نواز شریف تے مریم نواز کولوں ایف آئی اے نے اوہناں دے پاسپورٹ وی لے لئے نیں۔
نیب ٹیم نے نواز شریف تے مریم نواز نوں گرفتار کر لیا اے۔ جہاز توں لتھن مگروں نواز شریف نوں گڈی وچ بیٹھن دا آکھیا گیا پر نواز شریف نے گڈی وچ بیٹھن توں انکار کردے ہوئے پیدل ٹرمینل تیکر جان دی حامی بھری۔
دوجے پاسے نواز شریف تے مریم نواز دا لاہور ائر پورٹ اُتے استقبال
کرن لئی پنجاب بھر توں (ن) لیگی رہنماواں دی قیات وچ لیگی کارکن ائر پورٹ اپڑن دی کوشش کر رہے نیں۔
مسلم لیگ (ن) دے صدر شہباز شریف تے ہور سینئر رہنما وی اپنیاں اپنیاں ریلیاں دی قیادت کر رہے نیں۔ سکیورٹی خدشیاں نوں مُکھ رکھدے ہوئے لاہور دیاں کئی وڈیاں سڑکاں اُتے کنٹینرز لا دتے گئے نیں جدکہ لاہور توں اسلام آباد موٹروے تے جی ٹی روڈ نوں وی ٹریفک لئی بند کر دتا گیا اے۔
راوی پُل اُتے رکاوٹاں پار کرن دے معاملے اُتے مسلم لیگ (ن) دے کارکناں تے پولیس اہلکاراں وچ تلخی ہوئی، جیہدے مگروں دوویں پاسیوں اک دوجے نوں وٹے مارے گئے۔ کارکناں تے پولیس وچکار جھیڑے مگروں حالات خراب ہون دا ڈر اے۔