اسلام آباد( پاکستان پوائنٹ نیوز04۔جولائی۔2018ء ) احتساب عدالت نے ایون فیلڈ ریفرنس دا فیصلا پچھلے دیہاڑے محفوظ کیتا جو 6جولائی جمعے دے دیہاڑے سُنایا جائے گا۔
احتساب عدالت نے فیصلے دے دن سابق وزیر اعظم نواز شریف تے اوہناں دی دھی مریم نواز سنے سارے ملزماں نوں عدالت وچ سدیا اے۔
میڈیا رپورٹ مطابق سابق وزیر اعظم نواز شریف تے مریم نواز دا 6جولائی توں پہلاں یاں 6جولائی نوں وی پاکستان آن دا کوئی موڈ نہیں اے۔
قومی اخبار وچ چھپن والی اک رپورٹ مطابق نواز شریف دے نیڑلے وسیلیاں نے دسیا اے کہ نواز شریف الیکشن توں دس دن پہلاں ای پاکستان آن دا ارادہ رکھدے نیں، جیہدے وچوں اوہ 9دن بھرپور انتخابی مہم چلان گے۔
کئی سیاسی مبصرین نے ایون فیلڈ ریفرنس
دے فیصلے تے نواز شریف، مریم نواز دے عدالت وچ نہ ہون بارے گل بات کردے ہوئے آکھیاکہ انج وی ہو سکدا اے کہ احتساب عدالت ایون فیلڈ ریفرنس وچ کیپٹن (ر) صفدر دے پیش ہون اُتے صرف اوہناں دا فیصلا سُنا دیوے جدکہ نواز شریف تے مریم نواز دے فیصلے نوں اگانہ ودھاندے ہوئے اوہناں نوں اشتہاری قرار دے دیوے۔
قانونی ماہرین دا کہنا اے کہ ملزم نہ ہون اُتے وی عدالت فیصلا سُنا سکدی اے۔ جیہدے مگروں سزا اُتے عملدرآمد ملزماں دی گرفتاری مگروں ای شروع ہوئے گا۔
وسیلیاں مطابق جے سابق وزیراعظم نواز شریف، مریم نواز تے کیپٹن (ر) صفدر ریفرنس کیس وچ بری ہو جاندے نیں تے نواز شریف تے مریم نواز 9جولائی نوں واپس آ جان گے۔جے انج نہ ہویا تے کیس اگانہ چلا جائے گا۔