سرگودھا( پاکستان پوائنٹ نیوز27۔جون2018ء ) پیر آف سیال شریف نے این اے 90وچ تحریک انصاف دی امیدوار ڈاکٹر نادیہ عزیز، پی پی 77وچ چودھری اقبال، پی پی 78وچ عنصر مجید نیازی دی حمایت دا اعلان کر دتا اے۔
پیر آف سیال شریف حمید الدین سیالوی دے سیاسی جانشین صاحبزادہ قاسم نے ایہ اعلان پچھلے دیہاڑے ڈاکٹر نادیہ دے گھر کیتا۔
ایس موقعے تے اوہناں نے آکھیا کہ سبھ توں پہلاں سانوں ساڈا دین عزیز اے، ایہدے مگروں ملک ، جماعت تے فیر سیاسی جُڑت ۔
اوہناں دا کہنا سی کہ ختم نبوت دے قانون وچ ناپاک سازش کیتی گئی جو کامیاب نہ ہو سکی، ختم نبوت قانون وچ ترمیم کرن والی جماعت
دی حمایت دا سوچ وی نہیں سکدے، ایس لئی اسیں مسلم لیگ (ن) دی بھرپور مخالفت بارے سوچ کے آخری ویلے وچ تحریک انصاف دی حمایت دا فیصلا کیتا اے، ملک بھر وچ ساڈے مریدین و عقیدت مند پی ٹی آئی دے امیدواراں نوں سپورٹ کرن گے۔
ایس موقعے تے ملک عزیز الحق، عنصر مجید نیازی، چودھری اقبال نذیر خان نیازی سنے کارکناں دی وڈی گنتی موجود سی، جیہناں نے ڈاکٹر نادیہ عزیز دے گھر آمد اُتے صاحبزادہ قاسم سیالوی دا استقبال کیتا۔
ایس موقعے تے ڈاکٹر نادیہ عزیز نے حمایت کرن اُتے پیر آف سیال شریف دا شکریہ ادا کیتا تے آکھیا کہ ناموس رسالت لئی ساڈی جان وی حاضر اے۔