کاغذات نامزدگی جمع کروان ویلے اسد عمر کول فیس لئی پیسے گھٹ پے گئے اُدھار پیسے لے کے کاغذات نامزدگی دی فیس جمع کروائی

اسلام آباد( پاکستان پوائنٹ نیوز08۔جون2018ء ) کاغذات نامزدگی جمع کروان ویلے تحریک انصاف دے رہنما اسد عمر کول فیس لئی پیسے گھٹ گئے۔

اسد عمر نے پی ٹی آئی کارکن توں اُدھار پیسے لے کے کاغذات نامزدگی فیس جمع کروائی۔ تفصیل مطابق پاکستان تحریک انصاف دے رہنما اسد عمر اپنی شخصیت دے وجہ توں ڈاڈھی شہرت رکھدے نیں جدکہ اسد عمر دی ذہانت دیاں مثالاں وی دتیاں جاندیاں نیں۔

پاکستان تحریک انصاف دے چیئرمین عمران خان وی ایس گل اُتے فخر محسوس کردے ہوئے کئی وار آکھ چکے نیں کہ اسد عمر ورگا ذہین بندہ اوہناں دی پارٹی دا حصہ اے۔

اسد عمر کئی ٹی وی چینلز اُتے بِہ کے اپنی پارٹی دا وی بھرپور دفاع کردے نیں۔ پچھلے دیہاڑے تحریک انصاف دے رہنما اسد عمر جدوں کاغذات

نامزدگی جمع کروان ریٹرنگ افسر دے کمرے وچ اپڑے تے پتا لگا کہ قومی اسمبلی دے حلقے لئی کاغذات نامزدگی فیس 30ہزار رُپئے اے۔

دلچسپ صورتحال اودوں بنی جدوں اسد عمر نے فیس جمع کروان لئی اپنا بٹوا کھولیا تے اوہدے وچ پورے پیسے نہیں سن۔ اجیہی صورتحال وچ اسد عمر نے بغیر شرمائے پاکستان تحریک انصاف دے کارکن توں قرض دے طور اُتے پیسے لئے۔

کارکن نے وی بغیر دیر کیتے 20ہزار رُپئے اسد عمر نوں دے دتے۔ ایس موقعے اُتے موجود اک رپورٹر نے آکھیا کہ کیتے تہاڈے اُتے رشوت دا الزام نہ لگ جائے۔

جواب وچ اسد عمر دا کہنا سی کہ میں پنج سال توں رکن قومی اسمبلی آں۔ پر حالت ایہ اے کہ قرض لے کے فیس جمع کروا رہیا واں۔ جیہدے اُتے کول کھلوتے کارکن وی ہس پئے۔