اکھاں وچوں پانی دی بجائے خون نکلدا اے،لاہور دی واسی نوجوان کُڑی خطرناک روگ دا شکار،امداد دی اپیل

لاہور( پاکستان پوائنٹ نیوز06۔جون2018ء ) لاہور دی واسی 15ورھیاں دی یاسمین ہیپاٹائٹس سی تے معدے دے السر دی بیماری دا شکار اے۔ ایس بیماری دی وجہ توں یاسمین دیاں اکھاں توں پانی دی بجائے خون نکلدا اے۔ اُردو پوائنٹ نال اُچیچی گل بات کردے ہوئے یاسمین دی ماں نے دسیا کہ 2014دے تیجے مہینے وچ یاسمین سکول جا رہی سی ، اوہدے پیپرز ہو رہے سن، سکول جاندے ہوئے اوہنے اللہ حافظ آکھیا تے نال ای سر پھڑ کے ہیٹھاں بِہ گئی،یاسمین نے مینوں چُپ رہن دا اشارہ کیتا جیہدے مگروں اوہنوں خون دیاں تن اُلٹیاں آئیاں تے یاسمین بے ہوش ہوگئی۔ ریسکیو دی مدد نال اسیں یاسمین نوں گنگا رام ہسپتال لے کے گئے جتھے ڈاکٹراں نے اوہنوں 10دن تیکر علاج لئی رکھیا۔ ایہدے مگروں ڈاکٹراں نے سانوں شیخ زید ہسپتال گھل دتا جتھے 15دن تیکر یاسمین دا علاج ہوندا رہیا۔ شیخ زید مگروں سانوں سروسز ہسپتال گھلیا گیا۔ یاسمین دی والدہ نے دسیا کہ اوہدے مگروں اسیں انمول ہسپتال، فاطمہ میموریل ہسپتال، شوکت خانم ہسپتال سنے لاہور دا کوئی ہسپتال اجیہا نہیں جتھوں اسیں اپنی دھی دا علاج نہیں کروایا۔ ساڈا اپنا گھر جیہنوں اسیں 18لکھ رُپئے دا ویچیا اوہ وی ایہدے علاج اُتے لگ گیا۔ یاسمین دی والدہ

دا کہنا سی کہ میرا خاوندمالی اے تے اوہدی لت ٹُٹی ہوئی اے۔ میرا پُتر وی مالی اے ۔ وسائل گھٹ ہون مگروں وی اسیں علاج کروایا، میری دھی روز ترفدی اے تے انج لگدا اے کہ میری دھی مر رہی اے۔ یاسمین پڑھ لکھ کے افسر بننا چاہندی سی پر اپنی بیماری دی وجہ توں اوہ کُجھ نہیں کر سکدی۔یاسمین نے آکھیا کہ میری چیف جسٹس، ملک ریاض ، شہباز شریف ، نواز شریف تے 22کروڑ لوکاں توں درخاست اے کہ اوہ مینوں ویکھ رہے نیں، جیہناں نوں رب دین والا اوہ اپنی اولاد دے صدقے میری مدد کرن کیونکہ میں جینا چاہنی آں۔ میں پڑھنا چاہنی آں۔ میں اپنے ماں پیو دا سہارا بننا چاہنی آں، میں سوچیا سی کہ کُجھ بن کے غریب لوکاں دی مدد کراں گی۔یاسمین نے آکھیاکہ شہباز شریف وڈے وڈے نوٹس لیندے نیں، رب لئی مینوں وی ویکھن تے ویلا کڈھن، میرے کول آن تے اوہناں نوں احساس ہوئے گا کہ میں کِنی تکلیف وچ آں، میریاں اکھاں توں لہو وگدا اے، مینوں لگدا کہ جیویں میریاں اکھاں وچ کوئی مرچاں پا رہیا اے۔ یاسمین دی والدہ نے مخیر حضرات توں اپیل کردے ہوئے اپنا فون نمبر 0344 4173709دتا۔ اوہناں نے اُردو پوائنٹ راہیں اپنا اکاؤنٹ نمبر وی مدد دے خاہمشند بندیاں لئی شیئر کیتا۔جو PK30ALFH0220001004262371

اے۔