عام انتخابات وچ کامیابی مگروں پنجاب دی وزارت اعلا کیہنوں ملے گی؟ پاکستان تحریک انصاف وچ الیکشن توں پہلاں جنگ شروع، تن امیدوار ساہمنے

اسلام آباد( پاکستان پوائنٹ نیوز05۔جون2018ء ) عام انتخابات توں پہلاں جتھے سیاسی جماعتاں وچ جوڑ توڑ دا سلسلا جاری اے اوتھے دوجے پاسے سیاسی جماعتاں اندر وی جنگ چھڑنا شروع ہو گئی اے۔

اک پاسے تے سیاسی جماعتاں نوں ٹکٹاں ونڈن وچ اوکڑاں دا ساہمنا اے تے دوجے پاسے کامیابی دی صورت وچ عہدیاں دی ونڈ وی اک اوکھا کم اے۔

سیاسی مبصرین مطابق ایس وار الیکشن وچ پی ٹی آئی دے جِتن دا موقع زیادہ اے۔ پچھلے کُجھ چِر توں پی آئی وچ دوجیاں وڈیاں سیاسی جماعتاں توں کئی انتخابی امیدوار وی رلتی ہو ئے جیہدی وجہ توں عام انتخابات 2018وچ پاکستان تحریک انصا ف دی کامیابی دا بہت امکان ظاہر کیتا جا رہیا اے۔

وسیلیاں مطابق پی ٹی آئی نے 272ٹکٹاں دا فیصلا کرنا اے پر ایس معاملے وچ پی ٹی آئی کول امیدوار بُہتے تے ٹکٹاں گھٹ نیں۔

ایہو وجہ اے کہ پی ٹی آئی اندر وی اک جنگ چھڑی ہوئی اے۔ کُجھ دن پہلے ای ٹکٹ دے معاملے اُتے ڈاکٹر عامر لیاقت حسین نے پارٹی

چھڈن دا وی آکھیا پر اجے تیکر اوہناں ولوں حتمی اعلان نہیں کیتا گیا۔

ایسے طرحاں علی محمد خان دا وی پارٹی قیادت نال ٹکٹ دے معاملے اُتے اختلاف ہون دی اطلاع اے۔ پر کُجھ معاملات ٹکٹ لین دین توں وی اگانہ اپڑ گئے نیں۔

پی ٹی آئی دی کامیابی دے نتیجے وچ پنجاب دی وزارت اعلا لئی امیدواراں نے پہلے توں ای اکھاں رکھ لیاں نیں۔ پارٹی وچ پنجاب دی وزارت اعلا بارے اک نویں جنگ چھڑی ہوئی اے۔

پنجاب دی وزارت اعلا لئی پی ٹی آئی ولوں تن ناں ساہمنے آئے نیں، جیہناں وچ علیم خان، شاہ محمود قریشی تے چودھر سرور شامل نیں۔

پر چودھری سرور نے شاہ محمود قریشی دے حق وچ پچھانہ ہٹن دا اعلان کیتا اے جیہدے مگروں ہن پنجاب دی وزارت اعلا لئی علیم خان تے شاہ محمود قریشی وچکار فیصلا ہوئے گا۔

ہن ویکھنا ایہ اے کہ ایہناں دوویں رہنماواں وچوں کیہنوں پنجاب دی وزارت دتی جاندی اے پر ایہدے لئی 2018دے عام انتخابات دی اُڈیک کرنی پئے گی۔