نجی ٹی وی چینل دی اک جعلی خبر نے کُڑی دی زندگی برباد کر دتی میری منگنی ٹُٹ گئی، نوکری چلی گئی، چیف جسٹس میرے بارے غلط خبر چلن دیاں تحقیقات کروان: کُڑی دی منگ

کراچی( پاکستان پوائنٹ نیوز31۔مئی2018ء ) نجی ٹی وی چینل دی جعلی خبر نے کُڑی دی زندگی برباد کر دتی۔ تفصیل مطابق کُجھ دن پہلاں نجی ٹی وی چینل اُتے اک خبر آئی سی کہ کراچی وچ اک گروہ لوکاں نوں بلیک میل کر رہیا تے بھتہ لے رہیا اے۔ ایس بارے جو ویڈیو تے تصویراں لائیاں گئیاں اوہ سوشل میڈیا اُتے وائرل ہو گئیاں پرہن ذکر کیتی گئی ویڈیو وچ نظرآن والی کُڑی ساہمنے آئی اے۔ سوشل میڈیا اُتے وائرل ہو رہی اک ویڈیو وچ کُڑی دا کہنا اے کہ میرا ناں سدرہ راجپوت اے تے میں کراچی دی رہن والی آں۔ 25مئی رات 4وجے میری فیک ویڈیو اک نجی ٹی وی چینل اُتے چلائی گئی جیہدے وچ میری صرف تصویر اے۔ جدکہ میرے بارے کوئی تفصیلاں ایس ویڈیو وچ شامل نہیں سن۔ تے ایہدے مگروں ایس نجی ٹی وی چینل نے اوہ ویڈیو وائرل کر دتی، پر ایہ خبر بلکل جھوٹھی اے تے میں ایس حوالے نال میڈیا دا مقابلا

کرن نوں وی تیار آں۔ کیونکہ ایس سارے معاملے وچ میرا کوئی قصور نہیں اے۔ ویڈیو وچ نظر آن والیاں دوجیاں کُڑیاں ڈریاں ہوئیاں نیں تے اوہ میڈیا ساہمنے نہیں آنا چاہندیاں۔ کُڑی دا کہنا اے کہ ایس جعلی خبر دا میری ذاتی زندگی اُتے ڈونگھا اثر پیا اے۔ میری منگنی ٹُٹ گئی، میری نوکری چلی گئی، لوک میرے خاندان توں طرحاں طرحاں دے سوال پُچھ رہے نیں۔ میرے بھرا باہر نکلن توں گھبرا رہیا کیونکہ اوہناں توں سوال کیتے جاندے نیں؟ میرے بھرا وی سوچدے نیں کہ ساڈی بھین ایس طرحاں دی تے نہیں سی۔ کُڑی دا کہنا سی کہ ایس اک جعلی خبر دی وجہ نال میرا مستقبل تے کریئر تباہ ہو گیا اے۔ میں چیف جسٹس آف پاکستان توں منگ کردی آں کہ اوہ ایس جعلی خبر دیاں تحقیقات کروان تے پرچا کار خلاف ایکشن لین، جیہنے سوشل میڈیا توں میری تصویر لے کے ایہدے اُتے خبر بنا دتی۔