دہشت گرداں دی حمایت کردے تے ساڈے 73ہزار شہریاں تے سکیورٹی اہلکاراں دی جان کیوں لِتی جاندی؟:ترجمان پاک فوج افغانستان تے پاکستان مذاکرات راہیں ای سارے مسئلیاں دا حل لبھ سکدے نیں، سرحدی میکنزم دا مقصد صرف دہشت گرداں نوں دوویں ملکاں وچ وڑن توں روکنا اے:ترجمان پاک فوج دی افغان پرچاکاراں نوں بریفنگ

راولپنڈی(پاکستان پوائنٹ نیوز22۔اگست2017ء) پاک فوج دے ترجمان میجر جنرل آصف غفور نے پاکستان اُتے دہشت گرداں دی حمایت دا الزام رد کرد ے ہوئے آکھیا اے کہ جے پاکستان دہشت گرداں دی حمایت کردا تے فیر دہشت گردی خلاف جنگ وچ ساڈے 73ہزار شہریاں تے سکیورٹی اہلکاراں دی جان کیوں لِتی جاندی ؟ امریکی فوجی افسراں تے اہلکاراں نوں اوہناں دے دورے دوران حقانی نیٹ ورک خلاف کیتے جان والے ایکشن دے ثبوت دتے سن، افغانستان تے پاکستان مذاکرات راہیں ای سارے مسئلیاں دا حل لبھ سکدے نیں، سرحدی میکنزم دا مقصد صرف دہشت گرداں نوں دوویں ملکاں وچ وڑن توں روکنا اے۔

منگل نوں آئی ایس پی آر وچ افغان پرچا کاراں نوں بریفنگ دیندے ہوئے ترجمان پاک فوج دا کہنا سی کہ سانوں منفی شیواں دی بجائے مثبت شیواں ول توجہ دینی چاہیدی، میں کدی وی فوجی ہون دے ناطے ترجمان افغان فوج یاں افغان حکومت خلاف بیان نہیں دتا اے۔

اوہناں نے آکھیاکہ میڈیا نوں دوویں ملکاں وچکار پُل دا کردار نبھانا چاہیدا۔ اوہناں

پرچا کاراں نوں مخاطب کردے ہوئے آکھیا کہ تُسیں ایتھے موجود او تے تسیں جہڑی شے دا وی پاکستان اندر مشاہدہ کردے او، تہاڈے اگے بینتی اے کہ تُسیں افغانستان جا کے لوکاں اگے اوہدا ضرور ذکر کرو۔

اوہناں نے آکھیا کہ میں تہانوں دعوت دینا واں کہ پاکستان وچ تُسیں جتھے وی جانا چاہندے او اسیں تہانوں لے کے جان لئی تیار آں تاں جے تُسیں آپ ہر شے نوں ویکھ سکو۔

اوہناں نے آکھیا کہ سرحداں بند کرنا چنگی گل نہیں اے تے نہ ای ایہ مسئلیاں دا حل اے، اجیہے فیصلیاں نال پاکستان نوں وی نقصان ہوندا اے۔

اوہناں دا کہنا سی کہ پاکستان نے سرحد اُتے جو میکنزم قائم کیتا اے اوہدا مقصد پرامن لوکاں نوں سرحد پار کرن وچ مدد دینا اے۔

ایس میکنزم دا مقصد صرف دہشت گرداں نوں دوویں ملکاں اندر آن توں ڈکنا اے۔میجر جنرل آصف غفور دا کہنا سی کہ جے افغانستا نوں ایس نظام اُتے تحفظات نیں تے سانوں دسیا جائے کہ کیہڑا تیجا راہ اے جہدے راہیں غیر قانونی آوا جاوی نوں روکیا جا سکدا اے۔