واشنگٹن(پاکستان پوائنٹ نیوز06۔جون2017ء) امریکا نے عرب ملکاں وچکار صلح کروان دی پیشکش کردے ہوئے آکھیا اے کہ اوہ خلیجی عرب ملکاں وچکار جاری اختلافات حل کران لئی کردار ادا کرن لئی تیار اے۔
غیر ملکی میڈیا مطابق امریکی وزیر خارجا ریکس ٹلر سن تے وزیر دفاع میٹس نے آکھیا اے کہ کئی عرب ملکاں ولوں قطر نال سفارتی تعلقات ختم کرن دے فیصلے کارن دہشت گردی خلاف جنگ متاثر نہیں ہووے گی۔
ایس توں پہلے پیر نوں سعودی عرب، مصر، متحدہ عرب امارات تے بحرین نے قطر اُتے دہشت گرداں نوں مدد دین دا الزام لاندے ہوئے سفارتی تعلقات، زمینی، فضائی و سمندری رابطے ختم کرن دا اعلان کیتا سی۔
قطرتے سعودی عرب
وچکار پچھلے کُجھ ورھیاں توں تناﺅ لگا آ رہیا اے جہدی وجہ قطر دے ایران نال قریبی تعلقات تے اخوان المسلمین ورگیاں اسلامی تحریکاں دی حمایت اے ۔
سڈنی وچ آسٹریلوی و امریکی وزیر خارجا تے دفاع دی سانجھی ملاقات مگروں میڈیا نال گل بات کردے ہوئے ریکس ٹلرسن نے آکھیا کہ اوہناں نوں نہیں لگدا کہ عرب ملکاں دے ایس فیصلے نال دہشت گردی خلاف خطے تے بین الاقوامی پدھر اُتے جاری لڑائی تے کوئی فرق نہیں پئے گا۔
امریکی وزیر خارجا نے خلیج تعاون کونسل دے رکن ملکاں اُتے زور دتا کہ اوہ اپنے اختلافات ختم کرن۔ اوہناں نے پیشکش کیتی کہ امریکا ایس سلسلے وچ ایہناں ملکاں دی مدد کرن لئی تیار اے۔