مستونگ دھماکا: مولانا فضل الرحمان دا ایتوار نوں ’احتجاج دیہاڑ‘منان دا اعلان

اسلام آباد(پاکستان پوائنٹ نیوز12۔مئی2017ء) جمعیت علماءاسلام (ف) دے سربراہ مولانا فضل الرحمان نے ایتوار نوں ’احتجاج دیہاڑ‘ منان دا اعلان کر دتا، اوہناں نے مستونگ دھماکے دی نندیا کردے ہوئے آکھیاکہ حیدری اُتے حملا بزدلانا کارروائی اے، ایہ حملا کسے اک بندے اُتے نہیں پوری قوم اُتے اے، ریاست ملک دشمن لوکاں خلاف بھرپور کارروائی کرے۔

اج چیئرمین سینیٹ رضا ربانی نال میڈیا نال گل بات کردے ہوئے اوہناں نے آکھیا کہ جے یو آئی قانون تے جمہوریت نال کھلوتی اے۔

پاکستان دے دشمن ملک اندر بے چینی پیدا کرنا چاہندے

نیں پر اسیں امن دے نال آں، پوری دنیا وچ امن چاہندے آں۔ اوہناں دا کہنا سی کہ سانوں ملک دشمناں خلاف اک صف وچ کھلون دی لوڑ اے۔

ایس موقعے اُتے چیئرمین سینیٹ رضا ربانی نے آکھیا کہ عبدالغفور حیدری اُتے حملا پارلیمان اُتے حملا اے۔ اوہناں نے آکھیا کہ جنرل مشرف دے دور وچ ساڈے اُتے جو جنگ مسلط کیتی گئی اوہدا نتیجہ اسیں بھگت رہے آں۔

اوہناں نے آکھیا کہ اسیں سکیورٹی آپریشنز وچ اک حد تک کامیابی حاصل کیتی اے پر ایہ سمجھنا کہ دہشت گردی نوں اک دم ختم کر دتا جائے ایہ ٹھیک نہیں اے بلکہ ایہ اک لمی جنگ اے۔