اسلام آباد(پاکستان پوائنٹ نیوز19۔اپریل2017ء) وزیر اعظم میاں محمد نواز شریف دی صدارت ہیٹھ سیاسی مشاورتی اجلاس ہویا۔
اجلاس وچ سپیکر قومی اسمبلی ایاز صادق، راجا ظفر الحق، گورنر سندھ محمد زبیر، وفاقی وزیر خزانا اسحاق ڈار، وفاقی وزیر ریلوے خواجا سعد رفیق، وفاقی وزیر داخلا چودھری نثار علی خان، وزیر اعظم دی دھی مریم نواز، کیپٹن (ر) صفدر تے سندھی پارٹی قیادت سنے ہور سینئر رہنماواں نے رلت کیتی۔
وسیلیاں نے دسیا کہ اجلاس وچ پاناما دے متوقع فیصلے بارے وچار وٹاندرا کیتا گیا۔ اجلاس وچ سندھ اندرپارٹی حکمت عملی اُتے وی غور کیتا گیا۔
دوجے پاسے وزیر اعظم نواز شریف دی پارٹی دے کئی رہنماواں نال ملاقاتاں وی جاری نیں۔ ملاقاتاں وچ پاناما فیصلے تے ملکی سیاسی صورتحال بارے گل بات جاری اے۔
اجلاس نال خطاب دوران وزیر اعظم نواز شریف دا کہنا سی کہ سندھ جانا ساڈا حق اے۔ کسے نے سندھ وچ کم نہیں کیتا۔ اوہناں نے آکھیا کہ سیاسی مخالفاں نوں پورا حق اے کہ اوہ پنجاب سنے جتھے جانا چاہن شوق نال جان، لوکائی ساڈی کارکردگی ویکھ رہے نیں تے دوجیاں دے کم وی لوکائی ساہمنے نیں۔
وزیر اعظم نے ہدایت کیتی کہ روشن پاکستان دا پیغام سندھ دے ہر شہر تے پنڈ تک اپڑاواں گے۔ اوہناں نے آکھیا کہ سندھ وچ لوکائی دی حمایت حاصل ہو رہی اے ۔
وزیر اعظم نواز شریف نے سندھ دے شہراں دی مَندی حالت اُتے ہرکھ دا وکھالا کردے ہوئے اجلاس دوران ہدایت کیتی سندھی لوکائی نوں جدید شہری، ڈاکٹری تے تعلیمی سہولتاں دتیاں جان۔
چیتے رہوے کہ کل دوپہر دو وجے پاناما کیس دا فیصلا سپریم کورٹ روم نمبر ون وچ سنایا جائے گا۔