بانی ایم کیو ایم کیس: انصاف دے تقاضے پورے کیتے جان گے: برطانوی وزیر داخلا پاکستانی لوکائی تے پر واسیاں نال قریبی رابطے نیں، پاکستان نال مختلف شعبیاں وچ تعاون نوں ہور فروغ دینا چاہندے آں: برطانوی وزیر داخلا امبرر دی پریس کانفرنس

اسلام آباد(پاکستان پوائنٹ نیوز21۔مارچ2017ء) وفاقی وزیر داخلا چودھری نثار علی خان نے برطانوی ہم منصب نال ملاقات کیتی۔

ملاقات وچ خطے دی سکیورٹی صورتحال سنے باہمی دلچپسی دے امور اُتے وچار وٹاندرا کیتا گیا۔ ملاقات مگروں پریس کانفرنس نال خطاب وچ وفاقی وزیر داخلا چودھری نثار علی خان دا کہنا سی کہ ملاقات وچ برطانوی وزیر داخلا امبررد نال کئی معاملات اُتے گل بات ہوئی۔

برطانوی وزیر داخلا نال سکیورٹی، انسداد دہشتگردی، منشیات تے امیگریشن اُتے وی گل بات جاری رکھن اُتے اتفاق ہویا۔

ملاقات وچ دوویں ملکاں نے اک دوجے دے نکتہ نظر نو سمجھیا۔ دویں ملکاں نے سانجھے مسائل دے حل اُتے اتفاق کیتا اے۔

اوہناں نے دسیا کہ برطانیا تے پاکستان وچکار دو سمجھوتیاں اُتے دستخط ہوئے نیں۔ برطانیا نال پاکستان دے پَکے تعلقات نیں۔

اوہناں دا کہنا سی کہ ملاقات دوران معلومات دے وٹاندرے دے حوالے نال وی گل بات ہوئی۔ اوہناں نے آکھیا کہ برطانیا تے پاکستان وچ اجیہے کوئی مسئلے نہیں جو تعلقات وچکار اوکڑاں پان۔

گل بات مگروں ای دو سمجھوتیاں

اُتے دستخط کیتے نیں۔ اوہناں دا کہنا سی کہ دستاویزات دے بغیر برطانیا وچ رہن والے پاکستانیاں بارے سمجھوتا ہویا اے، امید اے کہ برطانوی حکام آن والے ویلے وچ وی دورے کردے رہن گے۔

پریس کانفرنس نال خطاب وچ برطانوی وزیر داخلا دا کہنا سی کہ چودھری نثار علی خان نال تعمیری گل بات ہوئی۔ اوہناں نے آکھیا کہ پاکستانی معیشت بہتری ول جا رہی اے۔

امبررد دا کہنا سی کہ دہشت گردی دے نتیجے وچ پاکستان دا ڈاڈھا نقصان ہویا اے۔ پاکستان نال نیشنل ایکشن پلان وچ تعاون کرن دے خاہشمند آں۔

پاکستان کئی شعبیاں وچ تعلقات نوں فروغ دینا چاہندے آں۔ اوہناں دا کہنا سی کہ پاکستانی لوکائی تے پر واسیاں نال قریبی تعلقات نیں۔

برطانیا وچ سارے لوکاں نوں اِکو جہیا انصاف ملدا اے۔ دوویں ملکاں دی خشحالی لئی سانجھے موقعے موجود نیں۔ برطانوی وزیر داخلا نے آکھیا کہ دہشت گردی دے مکمل خاتمے لئی اجے بہت کُجھ کرنا باقی اے۔

اوہناں نے پاکستان دی پولیس دی تعریف کردے ہوئے آکھیا کہ پولیس دا کردار بہتر بنان لئی چودھری نثار دا کردار اہم اے۔