سیالکوٹ(پاکستان پوائنٹ نیوز25۔فروری2017ء) سیالکوٹ وچ غلطی نال ورکنگ باﺅنڈری پارکرن والی بُڈھی سوانی (بی ایس ایف) دی فائرنگ نال شہید ہوگئی۔
سیالکوٹ دے تھانا پھکلیان پولیس دے مطابق پنڈ دیاوڑہ دی رہائشی سوانی رشیدہ بی بی دا ذہنی توازن ٹھیک نہیں سی تے اوہ دو دن پہلے غلطی نال سرحد پار کر گئی سی۔
پولیس دے مطابق ورکنگ باﺅنڈری پار کرن اُتے بھارتی سکیورٹی فورسز نے سوانی اُتے فائرنگ کر دِتی، فائرنگ دے نتیجے وچ اوہ شہید ہو گئی۔
سوانی دی موت مگروں سرحدی پنڈ وچ شہریاں دے احتجاج کرن اُتے بھارتی
سکیورٹی فورسز نے پاکستانی سکیورٹی فورسز دی موجودگی وچ لاش وارثاں دے حوالے کر دِتی۔
یاد رہوے کہ پچھلے ورھے اگست وچ وی بھارت دی بارڈر سکیورٹی فورس (بی ایس ایف) نے غلطی نال سرحد پار کر کے بھارت چلے جان والے نوجوان نوں گولی مار کے شہید کر دِتا سی جہدی لاش بعدوں پاکستانی رینجرز دے حوالے کیتی گئی۔
پچھلے ورھے ای رینجرز نال لاہور وچ ہون والی ملاقات دے دوران بی ایس ایف نے غلطی نال سرحد پار کرن والیاں دی محفوظ واپسی دے عزم دا اظہار کیتا سی پر ایہدے اُتے عملدرآمد نہیں کیتا جاندا۔