پی ٹی آئی نے پولیس نوں غیر سیاسی بنان دا ’پولیس بل 2017‘ پنجاب اسمبلی وچ جمع کروا دِتا

لاہور(پاکستان پوائنٹ نیوز22۔فروری2017ء) تحریک انصاف نے پولیس نوں غیر سیاسی تے با اختیار بنان دا ’پولیس بل 2017‘ پنجاب اسمبلی وچ جمع کروا دِتا، بل سربراہ تحریک انصاف دی ہدایت اُتے اپوزیشن لیڈر میاں محمود الرشید نے جمع کروایا، بل جمع کروان مگروں قائد حزب اختلاف میاں محمود الرشید نے پریس کانفرنس کردے ہوئے بل دے نکات اُتے چانن پایا۔

اوہناں دا کہنا سی کہ بل قطی طور اُتے سیاسی نہیں، اوہدی منظوری لوکائی تے اک اہم ریاستی ادارے دے چنگے مفاد وچ اے ایس لئی بل دی منظوری لئی نہ صرف ہور سیاسی جماعتاں بلکہ پنجاب حکومت نال وی گل بات کیتی جائے گی۔

اوہناں نے آکھیا کہ پنجاب پولیس باصلاحیت ضرور اے پر ادارے دے پیشہ وارانہ امور دی بہترین انداز وچ انجام دین وچ حکمران اوکڑاں نیں۔

اوہناں نے آکھیا کہ موجودا پولیس نظام ناقص اے جدکہ کے پی کے وچ پولیس نظام دنیا دا بہترین نظام اے، جمع کرائے جان والے بل دا مقصد ایہ اے کہ پولیس بارے اک جامع صوبائی

قانون بنایا جاےءجدکہ پولیس آرڈر 2002اک وفاقی قانون اے جہنوں پنجاب نے بااختیار ہون دے مگروں وی اپنایا، پولیس آرڈر 2002اک آمرانا دور وچ جاری کردا آرڈیننس اے، ساڈے بل دا اک وڈا مقصد پولیس نوں بااختیار تے غیر سیاسی ادارا بنایا اے جو کہ لوکائی نوں جمہوری اداریاں راہیں جواب دہ ہوئے تے پولیس اندرونی طور اُتے موثر تے اعلا کارکردگی دی حامل ہون دے نال نال لوکئی دے جان و مال دے تحفظ نوں یقینی بنان وچ مدد ثابت ہوئے۔

میاں محمود الرشید نے آکھیا کہ بل دے سیکشن 10وچ اک پولیس بورڈ بنانا دا ذکر وی کیتا گیا جو 8سینئر افسراں اُتے مشتمل ہووے گی ایہ بورڈ پولیس دی کارکردگی ودھان لئی حکمت عملی بنا کے اپنیاں سفارشاں پولیس سربراہ نوں دیوے گا، بل اُتے گل بات کردے ہوئے اپوزیشن لیڈر نے ہور آکھیا کہ سیکشن 47وچ وضاحت نال ضلعی سطح اُتے پبلک لائزن کونسلرز دا یونین کونسل دی سطح اُتے قیام اے جہنوں چُنے نمائندے تے اعلا کردار دے حامل بندے ہون گے۔