اسلام آباد، لاہور(پاکستان پوائنٹ نیوز18۔فروری2017ء) پنجاب حکومت نے جماعت الدعوة دے سربراہ حافظ سعید تے اوہناں دے اک ہور قریبی ساتھی قاضی کاشف سنے اوہناں دی جماعت دے ہور رہنماواں دے ناں انسداد دہشت گردی ایکٹ (اے ٹی ای) دے تحت فورتھ شیڈول وچ شامل کر دِتے نیں۔
ایس توں وکھ حافظ سعید دا ناں ایگزٹ کنٹرول لسٹ وی شامل کر دِتا گیا اے۔ تفصیل دے مطابق اک نجی ٹی وی نوں ذکر کیتی گئی پیش رفت بارے دَسدے ہوئے اک پولیس افسر نے دسیا کہ محکمہ انسدداد دہشت گردی (سی ٹی ڈی) نے وفاقی وزارت داخلا دے حکم اُتے جماعت الدعوة دے سربراہ دا ناں اوس لسٹ وچ شامل کیتا، جہدے وچ پہلے ای 1450بندیاں دے ناں موجود نیں۔
جماعت الدعوة دے تن ہور بندے جہناں دے ناں فورتھ شیڈول وچ شامل کیتے گئے نیں، اوہناں وچ فیصل آباد توں تعلق رکھن والے عبداللہ، مریدکے دے مرکز طیبہ توں ظفر اقبال تے عبدالرحمان عابد شامل نیں۔
وفاقی وزارت داخلا نے ایہناں بندیاں نوں جماعت الدعوة تے فلاح انسانیت
فاﺅنڈیشن دے سرگرم رکن قرار دِتا، وزارت داخلا نے سی ٹی ڈی نوں ذکر کیتے گئے بندیاں خلاف ضروری کارروائی کرن دی ہدایت کیتی۔
سی ٹی ڈی افسر نے دسیا کہ گوانتانا موبے توں پاکستان منتقل ہون والے 3قیدیاں دے ناں وی فورتھ شیڈول وچ شامل کرن دی ہدایت دِتی گئی اے پر افسر نے جماعت الدعوة دے ہور رہنماواں دے ناں دَسن توں انکار کیتا۔
یاد رہوے کہ حافظ سعید نوں 30جنوری 2017نوں اوہناں دے گھر وچ نظر بند کر دِتا گیا سی، اوہناں دی نظر بندی اُتے اوہناں دی جماعت تے ہور اتحادیاں ولوں تشویش دا وکھالا کردے ہوئے وکھالے کرن دا اعلان کیتا گیا سی۔
ایہ سول حکومت ولوں اک بہت غیر معمولی پیش رفت سی جہدی حمایت فوج نے وی کیتی تے کئی حلقے ایس پیش رفت نوں سلامتی دیاں ترجیحاں نوں بدلن لئی جوڑ رہے نیں۔
ایس توں وکھ انسداد دہشت گردی ایکٹ 1997حکومت نوں ایہ اختیار دیندی اے کہ اوہ کسے وی بندے نوں کالعدم قرار دیندے ہوئے اوہنوں فورتھ شیڈول وچ شامل کر سکدی اے۔