یمنی ڈل انا عراقی وزیر خارجہ تون اوڑدہی

بغداد(پاکستان نیوز پوائنٹ 30اگست 2016ء) عراق نا وزیر خارجہ یمن اٹی اعلیٰ سیاسی کونسل نا تشکیل ءِ اسہ گچین و اہم گام اس گوندانے۔

عراق نا دورہ غا ہنوک آ یمنی ڈل بغداد اٹی وزیر خارجہ ابراہیم جعفری تون اوڑدہی کریر۔ ابراہیم جعفری دا اوڑدہی ٹی پارے کہ عراق، یمن اٹی اعلیٰ سیاسی کونسل نا تشکیل نا خیر مقدم ءِ کیک و اودے ملک انا نظم و نسق انا چلیفنگ نا بابت اسہ اہم و گچین گام اس سرپند کیک۔

عراق نا وزیر خارجہ ہنداوڑ مسلط کروک جنگ انا مقابلہ ٹی یمنی الس نا استقامت و پائیداری ءِ ستاکڑزوک پارے۔ اوپارے کہ یمن نا الس تینا ملک انا دفاع ءِ کننگ

ءُ و وطن نا دفاع نا کسر اٹی قربانی تننگ ءُ۔

عراق نا دورہ ءِ کروک آ یمنی ڈل انا سروک محمد عبدالسلام دااوڑدہی ٹی یمن نا مظلوم الس نا برخلاف امریکی سعودی جارحیت آ جہانی برادری نا خاموشی نا مذمت ءِ کرے۔

اوپارے کہ یمن نا الس نا مون آ داوخت آ جارحیت نا مقابلہ ٹی مزاحمت و پائیداری آن بیدس پین ہچ ءُ کسر اس اف۔ یمنی ڈل انا سروک یمنی الس نا مخ تفی ٹی حکومت عراق نا موقف نا منت واری ءِ ادا کرے۔

قابل ذکر ءِ کہ یمن نا سیاسی ڈل عراقی کمامدار آتون خیال آتا درشانی آن گڈ بغداد آ سرمسنے۔ دا ڈل عراق نا دورہ ءِ پورو کرسا لبنان آ کاہک۔