اسلام آباد(پاکستان نیوز پوائنٹ 02 فروری2016ء) دفتر خارجہ پارینے کہ بھارت نا دفاعی بجٹ اٹی ودکی و بھلو سلہہ سے نا ہلنگ آن ڈیہہ ٹی واک انا توازن زہمی مننگ کیک، دانا پاکستان اٹی ریاستی عنصر تا کمک اٹ نیام تمنگ نا ناقابل تردید شاہدی ساڑی ارے، آر ایس ایس کشمیری تا نسل کشی ٹی اوار ءِ، پاکستانی ہائی کمیشن غلطی اٹ سیم پار کننگ نارروال نا مسہ شاری تا وطن آ پدی اتنگ کن بھارتی کمامدار آتون رابطہ ٹی ءِ، ای سی او نا سروک دیوان یکم مارچ آ اسلام آباد اٹی مریک ، حسین حقانی ملک نا امیج ءِ زہمی کننگ نا کوشست اٹی اختہ ءِ۔
داخیال آتا درشانی ءِ دفترخارجہ نا ترجمان محمد نفیس زکریا پنچ شنبے آ ہفتہ وار پریس بریفنگ اٹی صحافی تا جتا سوج آتا ورندی ءِ ترسا کرے۔
کویت نا کنڈآن پاکستان تون اوار پنچ مسلم ملک آتیا ویزاپابندی نا بابت رپورٹ نا بابت اسہ سوج اسے نا ورندی ءِ ترسا ترجمان امریکہ ٹی پاکستان نا مسکوہی سفیر حسین حقانی متکن آ خبرءِ ری ٹویٹ کرینے۔
ترجمان پارے کہ حسین حقانی ءِ پاکستان نا نمائندگی نا اعزاز تننگا ولے بدقسمتی اٹ او پاکستان نا امیج ءِ زہمی کننگ و قومی مفاد نا برخلاف سرجزآتیٹی اوار ءِ۔
ترجمان پارے کہ حسین حقانی اخس ملک مخالف سرجزکننگ ءِ ہموخس ہی او بے نقاب مرسا کیک۔ حافظ سعید نا نظربندی نا بابت بھارتی ردعمل آ تران
کرسا ترجمان پارے کہ بھارت ایلو ملک آتا معاملہ غاتیا تران کننگ آن بیدس تینا معاملہ غاتے درست کے۔
پاکستانی کارروائی ءِ جہانی کہول آ ستا کننگ انگ ءِ۔ اوپارے کہ پاکستان دہشت گردی نا برخلاف بے پرخ کارروائی کننگ ءِ۔
بھارت نئے بیرہ پاکستان اٹی دہشت گردی ٹی اوار ءِ بلکن ایلو ملک آتا گل زمین ہم پاکستان نا برخلاف کاریم اٹ اتنگ ءِ۔
بھارت مقبوضہ کشمیر اٹی مسلم گیشتری علاقہ ءِ ہندوگیشتری ٹی بدل کننگ خوائک۔ اوپارے کہ بھارت اوغانستان نا کمک اٹ پاکستان اٹی نیام تمنگ ءِ۔
بھارت نا پاکستان اٹی ریاستی عنصر آتا کمک اٹ نیام تمنگ نا ناقابل تردید شاہدی ساڑی ارے وخت اس کہ بھارتی ادارہ تینا ہی گل زمین آ ہم دہشت گردی ٹی اوار مسنے۔
ترجمان نارووال آن مسہ پاکستان شاری تا کنڈآن غلطی اٹ سیم پار کننگ نا بابت اسہ سوج اسے نا ورندی ءِ ترسا پارے کہ نئی دہلی ٹی پاکستانی ہائی کمیشن اوفتا وطن آ پدی اتنگ کن بھارتی کمامدار آتون رابطہ ٹی ءِ۔
ترجمان اسہ سوج اسے ناورندی ٹی پارے کہ او آئی سی نا کشمیر نا بابت گچین کڑد مسنے۔ پاکستان مسلم ملک آتیٹی یکجہتی نا خواہندار ءِ۔
ترجمان پارے کہ اوغانستان نا بابت ننا موقف صفا ءِ ، پاکستان اوغانستان اٹی امن و سوگوی کن کوشست کننگ ءِ۔ اوغانستان اٹی امن پاکستان و غٹ ڈیہہ نا مفاداٹی ءِ۔