بنجائی وزیر خزانہ سینیٹر اسحاق ڈار نا اقتصادی کمکاری و شونداری نا تنظیم نا سیکرٹری جنرل اینجل گوریا تون اوڑدہی
اسلام آباد(پاکستان نیوز پوائنٹ 9دسمبر2016ء) بنجائی وزیر خزانہ سینیٹر اسحاق ڈار پارینے کہ رشوت ستانی نا توننگ نا بابت کنونشن اسکان رسینگ کن پاکستان اقتصادی کمکاری و شونداری نا تنظیم (اوای سی ڈی) نا وڑوڈول و معیار آ پورو سلنگ کن کاریم کننگ ءِ۔
دا تدوک آ مسہ تو انا وخت اونا ارٹ میکو اوڑدہی ئس۔ وزیر خزانہ او ای سی ڈی نا سیکرٹری جنرل ءِ پارے کہ ٹیکس معاملہ غاتیٹی تین پہ تینی انتظامی معاونت بارواٹی او ای سی ڈی نا کثیر الجہتی کنونشن اٹی اوار مننگ ءِ پاکستانی کابینہ پک کرینے۔
پاکستان 14ستمبر2016ء آ دا کنونشن آ دستخط کریسس۔ وزیر خزانہ پارے کہ کابینہ اودے اوپن گورنمنٹ پارٹنر شپ نا رکنیت
کن کاریم کننگ نا اختیار تسنے۔
وزیر خزانہ اوجی پی ٹی اوار مننگ کن پاکستان نا رضامندی نا درشانی نا چھٹی ءِ اوجی پی گلوبل سمٹ اٹی فرانسیسی صدر نا حوالہ کرینے۔
داوخت آ اوای سی ڈی نا سیکرٹری جنرل پاکستان نا اوجی پی ٹی اوار مننگ نا خیرمقدم ءِ کرسا پارے کہ اوجی پی نا ممبر شپ و اوای سی ڈی ٹی پاکستان نا فعال کڑد اونا بین الاقوامی کہول آ رائج گورننگ نا شفاف و قابل احتساب وڑوڈول آتے اختیار کننگ نا بابت عزم انا عکاس ءِ۔
اوپاکستان ءِ او ای سی ڈی ڈویلپمنٹ سینٹر اٹی اوار مننگ نا سلہ ءِ ترسا اودے اوجی پی نا بابت نیشنل ایکشن پلان نا تیاری ٹی تکنیکی کمکاری فراوان کننگ نا پیش کش ہم کرے۔