وزیراعظم نا احتساب کروک آعمران خان اینو عدالت آن نرنگ ءِ ، مسلم لیگ (ن) نا راہشون طلال چوہدری و دانیال عزیز نا میڈیا تون ہیت وگپ

اسلام آباد(پاکستان نیوز پوائنٹ 16نومبر2016ء) مسلم لیگ (ن) نا راہشونک پارینو کہ وزیراعظم محمد نواز شریف نا احتساب ءِ کروک آ عمران خان اینو عدالت آن نرنگ اٹی ءِ ، نن الیکشن کمیشن اٹی الف لیلیٰ کسہ غاتون آخا بلکن شاہدی تتون بسونن، ننا ریفرنس آ عمران خان خراج دُزی، بنی گالہ ٹی اُراہلنگ و منی لانڈرنگ آ قومی اسمبلی نا رکنیت آن نابود مننگ کیک۔

چارشنبے آ الیکشن کمیشن نا پیشن مسلم لیگ (ن) نا راہشونک طلال چوہدری و دانیال عزیز تینا وکیل آتون اوار میڈیا تون ہیت وگپ کرسا پاریر کہ مسلم لیگ (ن) نا راہشونک پانامہ لیکس نا معاملہ مون آ بننگ نا منہ دے گڈ 22اپریل آ سپریم کورٹ ءِ چھٹی اس نوشتہ کریسر کہ او دانا جاست و پاست کن کمیشن اس اڈ ایتے، نن ہفت تو مست تینے احتساب

کن پیش کریسن۔

اوپارے کہ عمران خان نا برخلاف درملکی فنڈنگ نا کیس اِراسال آن الیکشن کمیشن اٹی چلینگ انگ ءِ و او اونا ورندی ءِ تننگ آن نہ من ءِ۔

عمران خان غلط بیانی کننگ آن گڈ ولدا بشخنداری خواہک ، اول 35پنکچر آتا دوبہ ءِ خلک ولدا پارے کہ دا سیاسی بیان اس ئس، اودروغ آ تالان خبرآتے الس ءِ بنفے ، اونا سوب چینی صدر نا پاکستان نا دورہ ملتوی مس، او سیکورٹی رسک ءِ ، اونا حالیت رحم نا قابل ءِ۔

اوپارے کہ عمران خان ایلوتا پٹنگ نا ہیت ءِ کیک داسہ اونا تلاشی مریک۔ نن الیکشن کمیشن اٹ غٹ شاہدی تتون ساڑی مسونن، عمران خان 22نومبر آ اونا ورندی ءِ ایتے ، او تینا شکست نا بدلہ ءِ پاکستان آن ہلپ و مسلم لیگ (ن) دشمنی ٹی پاکستان دشمنی آن پاناد کے۔