سردار اختر جان مینگل مر مر انگا علاقہ غاتے ٹی فری میڈیکل کیمپ آتا اڈتننگ اٹ است خواہی ہلنگ ءِ، ضلع خضدار نا علاقہ شاہ نورانی سارونہ ٹی مسہ دے ئی فری میڈیکل کیمپ انا بناءِ کننگ نا وخت آ باسک صوبائی اسمبلی میر اکبر مینگل نا ہیت وگپ

کوئٹہ (پاکستان پوائنٹ نیوز26دسمبر 2018ء) بلوچستان نیشنل پارٹی (مینگل) نا بنجائی راہشون و باسک صوبائی اسمبلی میر محمد اکبر مینگل پارینے کہ سردار اختر جان مینگل خلوص نیت اتون مر مر انگا علاقہ غاتے ٹی فری میڈیکل کیمپ آتا اڈتننگ اٹ است خواہی ہلنگ ءِ۔

داخیال آتا درشانی ءِ او ضلع خضدار نا علاقہ شاہ نورانی سارونہ ٹی مسہ دے ئی فری میڈیکل کیمپ انا اڈتننگ و بناءِ کننگ نا وخت آ ہیت وگپ کرسا کرے۔

باسک صوبائی اسمبلی پارے کہ داکان مست ہم فری میڈیکل کیمپ اڈتسنے وپین وخت اس ہم ہنداوڑ شاری و خلقی آ علاقہ غاتے ٹی فری میڈیکل کیمپ خلسا الس ءِ درمان نا آسراتی تننگک۔

اوپارے کہ بلوچستان نیشنل پارٹی نا صدر و باسک قومی اسمبلی سردار اختر جان مینگل نا کوشست آتیان فری میڈیکل کیمپ

خلنگانے۔

فری میڈیکل کیمپ اٹی کراچی و بلوچستان نا چاہندار ڈاکٹر آک ساڑی ئسر و اوپی ڈی ٹی بشخ ہلکر۔ داوخت آ ناجوڑآتا بھلو کچ اس درمان کرفنگ کن کیمپ آ بسر درمان اٹی مریض آتے دوائی ہم تننگانے، اوفری میڈیکل کیمپ اٹی ساڑی مروک آ ڈاکٹر آتا منت واری ءِ ہرفسا پارے کہ ڈاکٹر آک تینا نہادی ءُ وخت اس کشسا داڑے مریض آتے ہرار و اوفتا مفت درمان اٹی بشخ ہلکر۔

فری میڈیکل کیمپ اٹی لعل جان بلوچ، ڈداکٹر عزیز بلوچ تحصیل خضدار نا مسکوہی صدر سفر خان مینگل، ڈاکٹر محمد بخش مینگل ڈی ایچ او خضدار ڈاکٹر سومارخان، میڈیکل آفیسر بی ایچ او شاہ نورانی ڈاکٹر محمد حنیف ، جنرل فزیشن ڈاکٹر نذیر احمد بلوچ ایم ایس خضدار ڈاکٹر محمد اسماعیل باجوئی ڈاکٹر محمد صدیق و ایلوک ساڑی ئسر۔