بنجائی وزیر شون و ڈٹ بندی احسن اقبال نا دالبندین اٹی میڈیا تون ہیت وگپ

کوئٹہ(پاکستان نیوز پوائنٹ 23ستمبر 2016ء) بنجائی وزیر شون و ڈٹ بندی احسن اقبال پارینے کہ سی پیک گیشتروختی ڈٹ اسے ہراڑآ 2030 ء اسکان مرحلہ وار کاریم چلینگک۔

قومی وڑنا دااہم ڈٹ انا برخلاف پاروک آک پین اسٹ نا زبان اٹی ہیت کننگ ءُ۔ داخیال آتا درشانی ءِ او چاغی نا صدر مقام دالبندین نا اسہ دے ئی دورہ نا وخت آ پرنس فہد ہسپتال و مرکزی بوائز ہائی اسکول نا دورہ نا وخت آ ہندی میڈیا تون ہیت وگپ کرسا کرے۔

داوخت آ بنجائی وزیر مرکزی بوائز ہائی اسکول دالبندین ءِ پاکستان نا گچین اسکول اس جوڑ کننگ نا پڑو کرے۔ اوپارے کہ وزیراعظم زوت ہی چاغی کن خصوصی شونداری پیکج نا منظوری ءِ ایتک۔

بنجائی وزیر احسن اقبال پرنس فہد ہسپتال و مرکزی بوائز ہائی اسکول ءِ پوسکنا آسراتی و درکار عملہ فراوان کننگ نا وعدہ کرسا پارے کہ چاغی ایٹمی دھماکہ غاتا گل زمین ءِ ، ہراملک ءِ دفاعی وڑاٹ سوگو کرے ہنداخاطران حکومت ہم چاغی ءِ شون ترسا سوگو جوڑ کیک۔

اویخین ترفے کہ چاغی ءِ ہم سی پیک تون

منسلک کرسا اقتصادی راہداری ءِ افغانستان و ایران تون گنڈنگک۔ اوپارے کہ اگہ 1999 ء ٹی مسلم لیگ(ن) نا حکومت نا تختہ چپی متوکہ تو اینو پاکستان ایشیانا ٹائیگر جوڑ مسکہ واہم اونا باوجود ساڑی آ حکومت مسکوہی نا وعدہ و ڈٹ آتے عملی جامع اس بیرفنگ ءِ۔

اوپارے کہ سی پیک نا سوب پاکستان ءِ مچ آ دنیا ٹی مرکزی کڑد دوئی مریک ہنداخاطران دشمنک سی پیک نا برخلاف سازش کننگ ءُ۔

اوپارے کہ سی پیک ڈٹ انا رداٹ گوادر اٹی فری زون اس جوڑ کننگک تانکہ زرکارآک اورآن فائدہ ہرفنگ کیر۔ اوپارے کہ سی پیک اٹی چائنا 46بلین ڈالرز نا زرکاری کننگ ءِ ہراٹی زیات تر توانائی نا ڈٹ آک اوارو وخت اس کہ ڈٹ انا افادیت آن جوان وڑاٹ فائدہ ہرفنگ کن حکومت ہم ارب آ روپئی نا ڈٹ آتا بناءِ کرینے۔

داوخت آ اوڑتون اوار وزیراعلیٰ بلوچستان نا کمکارک سخی امان اللہ نوتیزئی و سردار نجیب سنجرانی ، ضلع کونسل چاغی نا چیئرمین میر داؤد خان نوتیزئی، ڈی سی قادر بخش و ایلو افسر و ن لیگ نا ہندی کسرشونک ہم ساڑی ئسر۔