صدر مملکت ممنون حسین نا برونائی دارالسلام اٹی تعینات مروک آ ہائی کمشنر میجر جنرل (ر) طارق رشید خان تون ہیت وگپ

اسلام آباد(پاکستان نیوز پوائنٹ یکم ستمبر 2016ء) صدر مملکت ممنون حسین پارینے کہ برونائی دارالسلام پاکستان نا بے کچ خڑکی و باپت سنگت ءِ۔

تین پہ تینی تعلقداری تیٹی پین گہرائی کن تندہی اٹ کاریم کننگ نا گرج ءِ۔ اوداہیت ءِ پنچ شنبے آ برونائی دارالسلام اٹی تعینات مروک آ ہائی کمشنر میجر جنرل (ر) طارق رشید خان تون ہیت وگپ نا وخت آ پارے۔

صدر مملکت پندار سفیر آ زورشاغا کہ او برونائی تون تعلقداری تے پین گچین جوڑ کننگ کن تینا کڑد ءِ ادا کے۔ اوپارے کہ پاکستان و برونائی ٹی زرکاری نا بے پناہ وارخواہی ساڑی ءِ ہراڑآن ہڑتوم آ ملک آتا زرکار آتے فائدہ ہرفوئی مرے۔

صدر مملکت پارے کہ برونائی ءِ افرادی واک انا گرج ءِ ہراٹی پاکستان تینا کڑد ءِ ادا کننگ کیک۔ صدر مملکت پارے کہ ہڑتوم آ ملک آتا نیام اٹ ہرابشخ آتیٹی زرکاری مننگ کیک اوفتے آ خاص توجوہ تننگ نا گرج ءِ اوٹی تعلیم، تعمیرات و توانائی

نا بشخ آک زیات اہم ءُ۔

صدر مملکت پارے کہ ہڑتوم آملک آتا نیام اٹ واپار اخہ در زیات مریک ، ہموخہ در تعلقداری سوگو مریک۔ اوپارے کہ پاکستان و برونائی نا نیام اٹ دفاعی بشخ آتیٹی کمکاری ءِ ودفنگ نا گرج ءِ۔

صدر مملکت پارے کہ زرکاری ءِ مون آ دننگ کن ہڑتوم آ ملک آتا نیام اٹ فضائی سروس نا بناء آہم غور کننگے۔ صدر مملکت پارے کہ ہڑتوم آ ملک آتا نیام اٹ واپار تون اوار بڑزکو کہول آ پارلیمانی و السی رابطہ غاتے مون آ دننگ نا ہم گرج ءِ۔

اوپارے کہ ننا سفارتکار آتیا بھلو زمہ واری اس مریک کہ او پاکستان نا امیج ءِ دنیا ٹی گچین جوڑ کننگ کن تینا کڑد ءِ ادا کیر۔

صدر مملکت ہائی کمشنر میجر جنرل (ریٹائرڈ) طارق رشید خان ءِ برونائی دارالسلام اٹی بطور سفیر تعیناتی آ مبارکبادی تس و دا اومیت نا درشانی ءِ کرے کہ او پاکستان و برونائی نا تعلقداری تے پین سوگو کننگ اٹی تینا کڑد ءِ ادا کیک۔