اسپیکر قومی اسمبلی سردار ایاز صادق ناپاکستان اٹی تعینات ترکی نا سفیر جرجن بابر صادق تون اوڑدہی ٹی ہیت وگپ

اسلام آباد(پاکستان نیوز پوائنٹ 25اگست 2016ء) اسپیکر قومی اسمبلی سردار ایاز صادق پارینے کہ پاکستان و ترکی نا نیام اٹ تاریخی سنگتی ءِ ہرا ہر آزمائش آ ہمیش پورو سلیسنو، ترکی ہر مشکل وخت اٹی پاکستان تون تفینے۔

اوداخیال آتا درشانی ءِ پاکستان اٹی تعینات ترکی نا سفیر جرجن بابر صادق تون ہیت وگپ کرسا کرے ہراک پنچ شنبے آ پارلیمنٹ ہاؤس اٹی اسپیکر تون اوڑدہی کریر ۔

اسپیکر ہڑتوم آ برادر اسلامی ملک آتا نیام اٹ تعلقداری تے پین ودیکی تننگ کن ہڑتوم آملک آتا پارلیمنٹ نا باسک آتا نیام اٹ رابطہ غاتے پین مون آ دننگ آ زورشاغا۔

اوپارے کہ ہڑتوم آ ملک آتا پارلیمنٹ نا باسک آک ڈیہہ نا شونہالی و شون اٹی اہم کڑد ادا کننگ کیرہ۔ اوپارے کہ پارلیمانی سفارت کاری آن ہڑتوم آ ملک آتا پارلیمنٹ نا باسک آتے اسہ ایلو نا نقطہ نظر ءِ گچین وڑاٹ سمجھنگ و اسہ ایلو نا آزموندہ غاتیان مستفید مننگ نا وارخواہی

دوئی مریک۔

امت مسلمہ ءِ مون تروک ویل آتیا گڑتی نا درشانی ءِ کرسا سردار ایاز صادق پارے کہ مسلم ملک آتا پارلیمنٹ نا باسک آتیا امت مسلمہ ءِ مون تروک ویل آتے ایسر کننگ نا بھلو زمہ واری اس مریک اومسلم ملک آتا پارلیمنٹ نا باسک آتا نیام اٹ خڑکی کمک و رابطہ غاتے مون آ دننگ نا گرج آ زورشاغا ۔

ترکی نا سفیر پارے کہ پاکستان و ترکی سیاسی کہول آ اسہ وڑ نقطہ نظر نا حامل ءُ و ہڑتوم آ برادر ملک آک ہمیش جہانی علاقائی فورم آ اسہ ایلو نا مخ تفی ءِ کرینو۔

اوتین پہ تینی مفادات آتا غٹ بشخ آتیٹی کمکاری ءِ پین ودیکی تننگ نا خواہش نا درشانی ءِ کرینو۔ اوپارے کہ ہڑتوم آ ملک آتا الس اسیجائی دودوربیدہ و اقدار تخرہ۔

ہرافتے ہڑتوم آ ملک آتا الس نامفادات آتے کن کاریم اٹ ہتنگ مریک۔ او تینا حکومت نا کنڈآن پاکستان اٹی اقتصادی شون نا رفتار ءِ ترند کننگ کن ہر ممکن کمکاری نا باوری ترفے۔