وزیراعظم ناسلاہکار قومی تاریخ و ادبی میرات عرفان صدیقی تون اسلام آباد چیمبر آف کامرس اینڈ انڈسٹری ناڈل انا اوڑدہی

اسلام آباد(پاکستان نیوز پوائنٹ 17اپریل2017ء) وزیراعظم ناسلاہکار قومی تاریخ و ادبی میرات عرفان صدیقی تون دوشنبے نا دے اسلام آباد چیمبر آف کامرس اینڈ انڈسٹری (آئی سی سی آئی) نا ڈل اوڑدہی کرے۔

سلاہکار وزیراعظم تون اوڑدہی کروک آ ڈل اناسروکی ءِ آئی سی سی آئی نا صدر خالد اقبال ملک کریکہ۔ داوخت آ ڈل انا باسک آتون ہیت وگپ کرسا عرفان صدیقی پارے کہ امن کن علمی و ادبی سرجز آتا مون آ دننگ بے کچ اہمیت تخک۔

صنعتی، کاروباری وواپاری سرجزآک ہم امن و ایمنی ناگچین انگا حالیت آتون مشروط ءُ۔ اوپارے کہ حکومت ملکی معیشت نا شونداری کن صنعتی ،کاروباری و واپاری برادری نا کڑد ءِ بے کچ اہمیت ایتک۔

کاروباری برادری کتاب دوستی ناکلچر ءِ شون تننگ اٹی قومی تاریخ و ادبی میرات ڈویژن نا کوشست آتیٹی کمک فراوان کرسا قومی خذمت اٹی بشخ ءِ شاغنگ کیک۔

عرفان صدیقی اومیت ظاہر کرے کہ ایوان صنعت و واپار اسلام آباد، 22اپری آن بناء

کروک آ مسہ دے ئی قومی کتاب میلہ نا اڈتننگ کن المی کمک کیک۔

داوخت آ ایوان صنعت وواپار ناصدر خالد اقبال ملک پارے کہ نن توانائی نا تنکی نا مون ءِ توننگ و امن ا ویمنی ناحالیت آتے گچین جوڑ کننگ نا بابت حکومتی گام گیج آتے بے کچ قدر انا نظر اٹ ہرک۔

اوقومی کتاب میلہ نا بابت تیناہروڑنا کمک ناباوری ترفے۔ آئی سی سی آئی نا ڈل پارے کہ سلاہکار وزیراعظم عرفان صدیقی نا سرکڑدہ ہی ٹی کتاب دے آ قومی کتاب میلہ نا اڈتننگ راج اٹی مثبت رجحان آتا نشوونما کن خوش آئند ءِ۔

چیمبر نا باسک آک بجٹ نا نسخان و برآمد آتیٹی کمتی آ گڑتی نا درشانی ءِ کریر۔ اوپاریر کہ انفراسٹرکچر نا جوڑ جاڑ و مارک اپ ریٹ اٹی نمان کمتی آن صنعتی و واپاری سرجزآتے مون آ دننگانے ہرا بے کچ ستاکڑزک۔

چیمبر نا عہدیدارآک وزیراعظم ناپالیسی تا ستاءِ کرسا اومیت ظاہر کریر کہ پوسکن آ بجٹ اٹی صنعت وواپار ءِ مون تروک ویل آتے خاص وڑاٹ مون آ تخنگک۔